'' බලයේ ඉන්න තිබුණේ මෙහෙමයි..? " ජනපති රනිල්..|Hiru TV Blog

'' බලයේ ඉන්න තිබුණේ මෙහෙමයි..? " ජනපති රනිල්..

Wednesday, 07 August 2024 - 8:06 | Views - 276

බංග්ලාදේශ හිටපු අගමැතිනී ෂෙයික් හසීනාට බලයේ සිටීමට තිබූ ආකාරය පිළිබඳව ජනාධිපති රනිල් වික්‍රමසිංහ ඊයේ (06) පෙරවරුවේ කොළඹ තරු හෝටලයක දී ආරම්භ කෙරුණු 2024 පරිසර, සමාජීය හා පාලනය (ESG) පිළිබඳ සමුළුව අමතමින් සඳහන් කළා.

එහිදී ජනාධිපතිවරයා පවසා සිටියේ, කලීඩා සියා සිරෙන් නිදහස් කිරීම පිළිබඳ තමා සතුටුවන බවත්, බොහෝ කලකට පෙර මෙය හසීනා විසින් සිදු කළේ නම් තවමත් බංගලාදේශයේ අග්‍රාමාත්‍යවරිය ලෙස කටයුතු කළ හැකිව තිබූ බවත් ය.

එම උත්සවයේදී වැඩිදුරටත් අදහස් දැක්වූ ජනාධිපතිවරයා,

"අපගේ මිත්‍ර රටක් වන බංගලාදේශයේ දේශපාලනය පිළිබඳ කතා කිරීමට මා අදහස් නොකරන නමුත් ඒ පිළිබඳ යමක් සඳහන් කළයුතුයි. ෂෙයික් හසීනා මහත්මිය අග්‍රාමාත්‍ය ධුරයෙන් ඉවත්ව ගියත්, අප ඉතා අසීරු අවස්ථාවක සිටිදී ඇය අපේ රටට ඩොලර් මිලියන 200ක් ලබා දුන් බව මම සිහිපත් කළ යුතුයි.

ඒ නිසා මේ මොහොතේ ඇත්තටම වැටී සිටින පුද්ගලයෙකු ගැන හොඳ වචනයක් ප්‍රකාශ කිරීම සාධාරණ යැයි මම සිතනවා. කලීඩා සියා මහත්මිය සිරෙන් නිදහස් කිරීම පිළිබඳ මම සතුටු වෙනවා. ෂෙයික් හසීනා මහත්මිය මෙය බොහෝ කලකට පෙර සිදු කළා නම්, ඇයට තවමත් බංගලාදේශයේ අග්‍රාමාත්‍යවරිය ලෙස කටයුතු කළ හැකිව තිබුණා.

බංග්ලාදේශයේ තත්ත්වය ඉක්මනින් සමථයකට පත්වේවායි අප ප්‍රාර්ථනා කරනවා. බංගලාදේශ නැවත යථා තත්ත්වයට පත්වෙනු ඇති බවට මට සැකයක් නැහැ.කෙටි කාලීනව යම් යම් ප්‍රශ්න ඇති වේවි, නමුත් මතක තබා ගන්න ශ්‍රී ලංකාවේ අපටත් ඒ දේම සිදුවුණා. බංගලාදේශයේ විශාලතම ආයෝජකයින්ගෙන් අප ද එක් රටක් වන නිසා අපි ඒ රටේ රැකියා අවස්ථා ඇති කර තිබෙනවා."

Share This Article