ගිනස් පොතට යන්න හදන , පානදුර තොරණ (Photos)|Hiru TV Blog

ගිනස් පොතට යන්න හදන , පානදුර තොරණ (Photos)

Wednesday, 15 May 2024 - 12:06 | Views - 593

පානදුර ඓතිහාසික තොරණ සෑම වසරකම සිරිලක සමස්ත ජනතාවගේ නෙත් සිත් ඇද ගන්න මහා නිර්මාණයක් ලෙස ප්‍රචලිතය.

මෙවර එය ලොව මෙතෙක් ඉදි වූ විශාලතම තොරණ ලෙසින් ලෝකයේම අවධානයට ලක් වන අතරේ ගිනස් වාර්තා අතරට ද එක් වන්නට සූදානමින් ලහි ලහියේ ඉදි වෙමින් තිබෙනවා.

අභිමානවත් පානදුර බෞද්ධ පුනර්ජීවන නගරයේ නම ලොවට ගෙන යන්නට පානදුර ජයතිලක මාවතේ ඉදිවෙන එම තොරන් රාජයා උස අඩි අසූ දෙකකට වැඩි ප්‍රමාණයක් සහ පලල අඩි අසූ හයකට වැඩි ප්‍රමාණයකින් යුක්ත වනවා.

එය විදුලි බුබුළු එක්ලක්ෂ දස දහසකට ආසන්න ප්‍රමාණයකින් ද ඒකාලෝක වනු ඇති බවයි සඳහන් වන්නේ.

පානදුර එක්සත් පොදු වෙළද පොළ බෞද්ධ සමිතිය පරිත්‍යාගශීලීන්ගේ ද ආධාරැතිව මෙම ඓතිහාසික තොරන් රාජයා ඉදි කරන අතර, පසුගිය වසරේ (2023) එය ශ්‍රී ලංකාවේ විශාලතම තොරණ ලෙස ද අභිෂේක ලැබීය.

පුවක් කොටන් යොදා ගනිමින් ලංකාවේ දැනට ඉදිකෙරෙන එකම තොරණ ලෙස සැලකෙන මේ සඳහා මෙවර පුවක් ගස් හාරසියයක් පමණ යොදා ගෙන ඇති අතර ඒවා බුලත්සිංහල , යක්කලමුල්ල , මතුගම ආදී ප්‍රදේශවලින් සපයා ගෙන තිබෙනවා.

වෙසක් පුන් පොහෝ දින සිට නන්දිවාණිජ කතා වස්තුව පිලිඹිබු කෙරෙන මෙම දැවැන්ත තොරණ ප්‍රදර්ශණය කිරීම සඳහා පනහකට ආසන්න පිරිසක් මේ දිනවල දිවා රෑ නොබලා වෙහෙසෙමින් සිටින බවද සඳහන්.

මෙවර තොරණේ විදහා දැක්වෙන්නේ නන්දිවානිජ ජාතක කථාවස්තුව යි.

එසේම, මෙවරත් තොරණේ ප්‍රධාන චිත්‍ර ශිල්පියා වශයෙන් කටයුතු කරනු ලබන්නේ, ප්‍රකට කලාකරුවකු වන වර්ණගේ සසිත චතුරංගයි.

තවද, ඇක්‍රලික් තීන්ත යොදා ගනිමින් චිත්‍ර නිර්මාණය කිරීම මෙන්ම පුද්ගල චිත්‍ර ත්‍රිමාණ සිකුවින් භාවිතා කිරීමද මෙහි තවත් විශේෂත්වයකි.