මෙරට කතුන් ගැන සතුටුදායක පුවතක්..|Hiru TV Blog

මෙරට කතුන් ගැන සතුටුදායක පුවතක්..

Wednesday, 08 May 2024 - 8:36 | Views - 575

මෙරට කාන්තාවන්ගේ ආයු කාලය අවුරුදු 83ක් දක්වා වැඩි වී ඇති බව සෞඛ්‍ය ලේකම් විශේෂඥ වෛද්‍ය පාලිත මහීපාල පවසනවා.

ඊයේ (07) කොළඹදී පැවති වැඩසටහනකට එක්වෙමින් ඔහු මේ බව පවසා සිටියා.

"අද ලංකාවේ මරණ වලින් 89%ක් පිළිකා, හෘද රෝග, පෙණහළු රෝග සහ දියවැඩියාව යන බෝ නොවන රෝග නිසා සිදුවෙනවා.එයිනුත් වැඩි මරණ ප්‍රමාණයක් සිදු වන්නේ හෘද වස්තුවේ රෝග සහ ආඝාතය නිසා.වසරකට 60,000ක් පමණ ආඝාතයට ලක්ව 4,000ක් පමණ මියයනවා.මෙම රෝග වලින් වැළැකීමේදී කාරණා 04ක් ගැන දැනුවත් විය යුතුයි. එනම් දුම්පානය, මධ්‍යසාර භාවිතය, අධික ලෙස සීනි, ලුණු භාවිතය සහ ව්‍යායාම නොකිරිම.පසුගිය ශතවර්ෂය තුළ ලෝකයේ මිලියන 100ක් දුම්පානය නිසා මරණයට පත්වෙලා.ලෝක සෞඛ්‍ය සංවිධානය පවසන පරිදි මෙම ශතවර්ෂය තුලද එම ප්‍රවණතාව පැවතුන හොත් බිලියනයක් දුම්පානය නිසා මරණයට පත්වනු ඇති.ලෝකයේ වසරකට මිලියන 10ක් පමණ දුම්පානය නිසා මරණයට පත්වෙනවා.ව්‍යායාම නොකිරිම නිසාම මිලියන 1.4ක් පමණ ලෝකයේ මරණයට පත්වෙනවා.අප රටේ සියයට 46ක් පමණ කාන්තාවන් බර වැඩියි. ඒ වගේම පාසල් යන දරුවන් සියයට 10ක් පමණ බර වැඩියි.මෙරට සෞඛ්‍ය සේවාව කළාපයේ හොදම සෞඛ්‍ය සේවාවක්. අවම මාතෘ හා ළදරු මරණ අනුපාතිකයක් තිබෙන රට. කාන්තාවන් සදහා ආයු කාලය අවුරුදු 83ක් දක්වා වැඩි වෙලා. එය ඇමරිකාවටත් වඩා ඉහළින්. මේ සියල්ලටම හේතුව ප්‍රාථමික සෞඛ්‍ය සේවාවේ ශක්තිමත්භව" යැයි ද ඔහු පවසා තිබෙනවා.

Share This Article