ආසියාවේ අංක එක බවට පත්වෙමින් රුමේෂ් රන් පදක්කම ගෙල පලඳියි.. ක්‍රීඩා ලෝලීන්ගේ හදවත් දිනාගත් ස්වර්ණමය මොහොත මෙන්න..|Hiru TV Blog

ආසියාවේ අංක එක බවට පත්වෙමින් රුමේෂ් රන් පදක්කම ගෙල පලඳියි.. ක්‍රීඩා ලෝලීන්ගේ හදවත් දිනාගත් ස්වර්ණමය මොහොත මෙන්න..

Tuesday, 29 September 2026 - 18:51 | Views - 30

ජපානයේ පැවැත්වෙන ආසියානු ක්‍රීඩා උළෙලේ හෙල්ල විසිකිරීමේ අවසන් ඉසව්වෙන් මීටර් 88.55ක අතිප්‍රබල දුරක් වාර්තා කරමින් ඊයේ (28) ඓතිහාසික ප්‍රථම ස්ථානය හිමිකර ගත් ශ්‍රී ලංකාවේ රුමේෂ් තරංග, තමන් දිනාගත් අභිමානවත් රන් පදක්කම අද (29) නිල වශයෙන් ගෙල පැළඳීමට සමත් වුණා.

ආසියානු කලාපයේ ප්‍රබලතම මලල ක්‍රීඩක ක්‍රීඩිකාවන් රැසක් එකිනෙකා පරයා තරග වැදුණු මෙම දැවැන්ත තරගාවලියේදී, රුමේෂ් තරංග දැක්වූ අතිවිශිෂ්ට සහ විස්මිත දක්ෂතාවය හමුවේ මුළු ආසියාවේම අවධානය ශ්‍රී ලංකාව දෙසට යොමු වුණා.

ජපාන අහස යට ශ්‍රී ලංකා ජාතික කොඩිය ඉහළටම ඔසවා තබමින් රුමේෂ් රන් පදක්කම බාරගත් එම මොහොත සමස්ත ලාංකිකයින්ගේම නෙතඟට කඳුළක් නැංවූ අතිසංවේදී මෙන්ම ආඩම්බරකාරී අවස්ථාවක් බවට පත් වුණා.

මෙහිදී දෙවැනි ස්ථානය මීටර් 85.72ක දක්ෂතාවයක් දැක්වූ ඉන්දියාවේ සිං යෂ්වීර් (Singh Yashvir) හිමිකර ගත් අතර, තෙවැනි ස්ථානය මීටර් 84.35ක දක්ෂතාවයක් දැක්වූ ඉන්දියාවේම රෝහිත් යාදව් (Rohit Yadav) හිමිකර ගනු ලැබුවා.

ඉන්දියානු ප්‍රබල ක්‍රීඩකයින් දෙදෙනාම දෙවන සහ තෙවන ස්ථානවලට ඇද දමමින් රුමේෂ් තරංග ලබාගත් මෙම රන්මය ජයග්‍රහණය ශ්‍රී ලංකා මලල ක්‍රීඩා ඉතිහාසයේ රන් අකුරින් සටහන් වන තවත් සුවිශේෂී සන්ධිස්ථානයක්.