කොළඹ රථවාහන තදබදයට විසඳුමක්.. මෙට්‍රෝ බස් සේවාව තවත් මාර්ග 5කට..|Hiru TV Blog

කොළඹ රථවාහන තදබදයට විසඳුමක්.. මෙට්‍රෝ බස් සේවාව තවත් මාර්ග 5කට..

Tuesday, 29 September 2026 - 18:44 | Views - 25

කොළඹ නගරයේ පවතින අධික රථවාහන තදබදයට ස්ථිරසාර විසඳුමක් ලබාදෙමින්, මගී ජනතාවට වඩාත් කාර්යක්ෂම, පහසු සහ විධිමත් පොදු ප්‍රවාහන සේවාවක් සැලසීමේ අරමුණින් ක්‍රියාත්මක කෙරෙන ‘මෙට්‍රෝ බස් සේවාව’ (Metro Bus Service) තවත් නව බස් මාර්ග 5ක් දක්වා ව්‍යාප්ත කිරීමට රජය අද (29) කටයුතු කර තිබෙනවා.

ජනාධිපති අනුර කුමාර දිසානායක මහතාගේ ප්‍රධානත්වයෙන් තලංගම මෙට්‍රො ඩිපෝවේදී අද පූර්වාහ්නයේදී මෙම නව බස් සේවාවන් නිල වශයෙන් ආරම්භ කෙරුණා.

එම නව බස් මාර්ග වන්නේ,

1. මිලේනියම් සිටි ➜ කොළඹ කොටුව (22.3 km)

2. කහතුඩුව ➜ පිටකොටුව (35.7 km)

3. දෙමටගොඩ ➜ පානදුර (28.7 km)

4. බත්තරමුල්ල ➜ ඒකල (29.9 km)

5. කොල්ලුපිටිය වටරවුම් මාර්ගය (14 km)

‘Urban Luxury’ කාණ්ඩය යටතේ ධාවනය වන මෙම බස් රථ සඳහා සාමාන්‍ය බස් ගාස්තුව මෙන් දෙගුණයක ගාස්තුවක් අය කෙරෙන අතර, කාර්යබහුල වේලාවන්හිදී විනාඩි 15කට වරක් එක් මාර්ගයකට බස් රථ 25 බැගින් යෙදවීමට කටයුතු යොදා තිබෙනවා.

කොළඹට තනි තනිව පෞද්ගලික වාහනවලින් පැමිණෙන පිරිස් මෙම උසස් ප්‍රවාහන සේවාව වෙත ආකර්ෂණය කරගැනීම මඟින් නගරයේ වාහන තදබදය අවම කරගැනීම මෙහි ප්‍රධාන පරමාර්ථයයි.

රුපියල් බිලියන 7.5ක වියදමින් ආරම්භ කළ මෙම ව්‍යාපෘතිය වෙනුවෙන් බස් ප්‍රමුඛතා මන්තීරුව (Bus Priority Lane) නැවත සක්‍රීය කිරීමට පොලිසිය එකඟ වී ඇති අතර, ඉදිරි සිංහල හා දෙමළ අලුත් අවුරුද්දට පෙර තවත් බස් රථ 50ක් ගෙන්වා යාපනය, මහනුවර සහ ගාල්ල යන නගරාන්තර සේවාවන්ට ද යෙදවීමට කටයුතු කරන බව අමාත්‍ය බිමල් රත්නායක මෙහිදී වැඩිදුරටත් සඳහන් කර සිටියා.