පාපන්දු ලෝකයේ ඓතිහාසික හැරවුම් ලක්ෂ්‍යයක්..ශ්‍රීමත් ඩේවිඩ් බෙකම් බ්‍රිතාන්‍යයේ පළමු බිලියනපති ක්‍රීඩකයා ලෙස ඉතිහාසගත වෙයි.|Hiru TV Blog

පාපන්දු ලෝකයේ ඓතිහාසික හැරවුම් ලක්ෂ්‍යයක්..ශ්‍රීමත් ඩේවිඩ් බෙකම් බ්‍රිතාන්‍යයේ පළමු බිලියනපති ක්‍රීඩකයා ලෙස ඉතිහාසගත වෙයි.

Saturday, 16 May 2026 - 12:01 | Views - 90

එංගලන්ත පාපන්දු කණ්ඩායමේ හිටපු සුපිරි නායක ශ්‍රීමත් ඩේවිඩ් බෙකම් (Sir David Beckham), එක්සත් රාජධානියේ පළමු බිලියනපති ක්‍රීඩකයා බවට පත්වෙමින් නව ලෝක වාර්තාවක් පිහිටුවීමට සමත්වෙලා තිබෙනවා.

මෑතකදී නිකුත් වූ 2026 Sunday Times Rich List වාර්තාව ඇසුරින් විදෙස් මාධ්‍ය මේ බව තහවුරු කළා.

මේ නවතම වාර්තාවලට අනුව, ඩේවිඩ් බෙකම් හා ඔහුගේ බිරිඳ වන වික්ටෝරියා බෙකම් සතු මුළු ඒකාබද්ධ වත්කම බ්‍රිතාන්‍ය පවුම් බිලියන 1.185 ක් (£1.185 Billion) දක්වා කැපී පෙනෙන ලෙස ඉහළ ගොස් තිබෙනවා.

බිලියනපති තත්ත්වයට පත්වූ එක්සත් රාජධානියේ ප්‍රථම ක්‍රීඩකයා ලෙස බෙකම් ඉතිහාසගත වන බව බ්‍රිතාන්‍යයේ ධනවත්ම පුද්ගලයන්ගේ ලැයිස්තුව සම්පාදනය කරන විශේෂඥයින් පෙන්වා දුන්නා.

ඩේවිඩ් බෙකම් වෘත්තීය පාපන්දු ක්‍රීඩාවෙන් සමුගෙන වසර ගණනාවක් ගතවී ඇතත්, ඔහුගේ ජනප්‍රියත්වය හා සන්නාම වටිනාකම (Brand Value) බිඳකුදු අඩුවී නොමැති බව ආර්ථික විශ්ලේෂකයින් පෙන්වා දෙනවා.

ඔහු සතු ලෝක ප්‍රකට වෙළෙඳ සන්නාමයන්හි ප්‍රවර්ධන කටයුතු, Inter Miami පාපන්දු කණ්ඩායමේ හිමිකාරීත්වය හා විවිධ ක්ෂේත්‍රයන් පුරා පැතිරුණු සාර්ථක ව්‍යාපාරික ආයෝජනයන් මේ දැවැන්ත වත්කම් වර්ධනයට සෘජුවම දායකවූ බව සන්ඩේ ටයිම්ස් වාර්තාව තහවුරු කළා.

ක්‍රීඩකයෙකු ක්‍රීඩාවෙන් සමුගත් පසුවද සාර්ථක ව්‍යාපාරික අධිරාජ්‍යයක් ගොඩනඟන්නේ කෙසේද යන්නට ඩේවිඩ් බෙකම් කදිම ආදර්ශයක් සපයා තිබෙනවා.

මූලාශ්‍රය | බීබීසී