නෞකාවකින් මතුවූ අලුත්ම වෛරස් අවදානම.. හැන්ටාවෛරසටයට අප කෙතරම් බිය විය යුතුද?|Hiru TV Blog

නෞකාවකින් මතුවූ අලුත්ම වෛරස් අවදානම.. හැන්ටාවෛරසටයට අප කෙතරම් බිය විය යුතුද?

Tuesday, 12 May 2026 - 13:17 | Views - 166

ලෝකයේ විවිධ රටවල මගීන් රැගත් සුඛෝපභෝගී මගී ප්‍රවාහන නෞකාවක හැන්ටාවෛරසය (Hantavirus) ව්‍යාප්ත වීම පිළිබඳව මේ වනවිට ජාත්‍යන්තර සෞඛ්‍ය බලධාරීන්ගේ දැඩි අවධානය යොමුවෙලා තිබෙනවා.

ආර්ජන්ටිනාවෙන් ගමන් ආරම්භ කළ මේ නෞකාවේ මගීන් තිදෙනෙකු දැනටමත් මිය ගොස් ඇති අතර තවත් කිහිපදෙනෙකු ප්‍රතිකාර සඳහා යොමුකරලා තිබෙනවා.

බොහෝ දෙනෙකු තුළ මේ පිළිබඳව බියක් හටගෙන තිබුණත්, මෙය කොවිඩ්-19 හෝ ඉන්ෆ්ලූවෙන්සා වැනි වසංගත තත්ත්වයක් නොවන බව ලෝක සෞඛ්‍ය සංවිධානය පැවසුවා.

මේ වෛරසය මිනිසුන් අතර පහසුවෙන් පැතිරෙන්නේ නැති නිසා ගෝලීය වශයෙන් පවතින අවදානම ඉතා අඩු මට්ටමක පවතින බව සෞඛ්‍ය විශේෂඥයෝ පෙන්වාදී තිබෙනවා.

මීයන්ගේ මලමුත්‍රා හෝ කෙළවලින් දූෂණය වූ වාතය ආශ්වාස කිරීම මගින් හැන්ටාවෛරසය සාමාන්‍යයෙන් මිනිසුන්ට ආසාදනය සිදුවෙනවා.

මේ නෞකාවේ මගීන් වනාන්තර නැරඹීමට ගිය අවස්ථාවකදී වෛරසයට නිරාවරණය වන්නට ඇතිබව සැකකරනවා.

නෞකාවක් වැනි සීමිත ඉඩකඩක් ඇති ස්ථානයකදී ඉතා සමීප සම්බන්ධතා පවත්වන පුද්ගලයන් අතර මෙය පැතිරීමේ අවදානමක් පවතිනවා.

මේ වෛරසය ආසාදනයවූ විට මූලිකවම තද උණ, තෙහෙට්ටුව, මාංශ පේශී වේදනාව, උදරයේ වේදනාව, හුස්ම ගැනීමේ අපහසුව, වමනය, පාචනය වැනි රෝග ලක්ෂණ මතුවිය හැකියි.

නෞකාවේ සිටි මගීන් දැනටමත් එක්සත් රාජධානිය, ඇමරිකාව හා ස්විට්සර්ලන්තය ඇතුළු රටවල් රැසකට ගොස් තිබෙනවා.

ඔවුන් හරහා වෛරසය ව්‍යාප්ත වීම වැළැක්වීම සඳහා ජාත්‍යන්තර මට්ටමින් දැවැන්ත මෙහෙයුමක් ක්‍රියාත්මකවන අතර, ආරක්ෂිත පියවරක් ලෙස ඇතැම් මගීන්ට දින 45ක නිරෝධායන කාලසීමාවක්ද නිර්දේශ කරලා තිබෙනවා.

නිසි වේලාවට වෛද්‍ය ප්‍රතිකාර ලබා දීමෙන් රෝගීන්ගේ ජීවිත ආරක්ෂා කරගත හැකි බවත්, සාමාන්‍ය ජනතාව මේ පිළිබඳව අනියත බියක් ඇති කරගත යුතු නැති බවත් සෞඛ්‍ය අංශ අවධාරණය කරනවා.