වසරකට අලුතින් තැලසීමියා දරුවන් 60ක්.. මුළු රටම දැනුවත් විය යුතු සෞඛ්‍ය අනාවරණය මෙන්න..|Hiru TV Blog

වසරකට අලුතින් තැලසීමියා දරුවන් 60ක්.. මුළු රටම දැනුවත් විය යුතු සෞඛ්‍ය අනාවරණය මෙන්න..

Friday, 08 May 2026 - 15:50 | Views - 185

ශ්‍රී ලංකාව තුළ සෑම වසරකම අලුතින් තැලසීමියා රෝගී දරුවන් හැට දෙනකු (60) වාර්තා වන බවට සෞඛ්‍ය අමාත්‍යාංශය අනතුරු අඟවලා තිබෙනවා.

තැලසීමියා සහිත දරුවන් බිහිවීම වැළැක්වීමට නම් විවාහයට පෙර රුධිර පරීක්ෂාවක් සිදුකිරීම අත්‍යවශ්‍ය බව බලධාරීන් අවධාරණය කළා.

මේ වනවිට මෙරට තුළ තැලසීමියා රෝගීන් 2,500ක් පමණ සිටින බව ඊයේ (07) පැවැති මාධ්‍ය හමුවකදී අදහස් දැක්වූ බෝනොවන රෝග ඒකකයේ අධ්‍යක්ෂ විශේෂඥ වෛද්‍ය ශ්‍රීනි අලහප්පෙරුම සඳහන් කළා.

එසේම පුද්ගලයන් ලක්ෂ පහක (500,000) පමණ පිරිසක් තැලසීමියා රෝග වාහකයන් ලෙස හඳුනාගෙන ඇති බව ඇය අනාවරණය කළා.

තැලසීමියා යනු ජානමය වෙනසක් මගින් හිමොග්ලොබින් නිෂ්පාදනයේ දෝෂ ඇතිවීම නිසා හටගන්නා රෝගී තත්ත්වයක් බව වාර්තා කළා.

ශරීරය තුළ නිරක්තිය ඇති කරන මේ රෝගය සඳහා ඇටමිදුළු බද්ධ කිරීම තුළින් ප්‍රතිකාර ලබා ගැනීමට හැකියාව පවතින බව සෞඛ්‍ය අංශ පෙන්වාදී තිබෙනවා.

තැලසීමියා රෝගය කල්තියා හඳුනා ගැනීම සඳහා දිවයින පුරා රෝහල් 15ක විශේෂ ප්‍රතිකාර මධ්‍යස්ථාන ස්ථාපිත කර තිබෙනවා.

සම්පූර්ණ රුධිර පරීක්ෂණයක් (Full Blood Count) මගින් තමන් තැලසීමියා වාහකයෙකුදැයි පහසුවෙන් සොයාබැලිය හැකි බව වෛද්‍යවරුන් ප්‍රකාශ කළා.