සුවදායී නින්දකට සහ පහසු අවදිවීමකට සරල රහස්.. ශරීරයේ අභ්‍යන්තර ඔරලෝසුව පුහුණු කරගන්නා හැටි මෙන්න.|Hiru TV Blog

සුවදායී නින්දකට සහ පහසු අවදිවීමකට සරල රහස්.. ශරීරයේ අභ්‍යන්තර ඔරලෝසුව පුහුණු කරගන්නා හැටි මෙන්න.

Monday, 07 September 2026 - 13:46 | Views - 28

අප බොහෝ දෙනෙකුට උදෑසනින් අවදි වීම සඳහා ජංගම දුරකතනයේ හෝ ඔරලෝසුවක alarm ශබ්දය මත විශ්වාසය තැබීම එදිනෙදා ජීවිතයේ අනිවාර්ය කොටසක් වී අවසන්.

කෙසේ වෙතත්, කිසිදු alarm උපකරණයක සහයකින් තොරව නියමිත වේලාවට ස්වයංක්‍රීයව අවදි වීමට ඔබේ ශරීරය පුහුණු කිරීමෙන්, උදෑසන ඇති වන නිදිමත සහ අලස බව අඩු කරගනිමින් වඩාත් ප්‍රබෝධමත් මනෝභාවයක් ලබාගැනීමට හැකි බව විද්‍යාත්මක පර්යේෂණ පෙන්වා දෙනවා.

විශේෂඥයන් පෙන්වා දෙන්නේ සාමාන්‍යයෙන් වැඩිහිටියෙකුට දිනකට පැය 7 සිට 9 දක්වා නින්දක් අත්‍යවශ්‍ය වන බව පැය 6කට වඩා අඩු නින්දක් ලබා ගැනීමෙන් අකල් මරණ අවදානම 20%කින් පමණ ඉහළ යා හැකි අතර, එක් එක් පුද්ගලයාගේ ජෛව විද්‍යාත්මක චක්‍රීය රිද්මය අනුව නිදා ගැනීමට අවශ්‍ය කාලය යම් ප්‍රමාණයකට වෙනස් වීමේ හැකියාවක් තිබෙනවා.

ඔබේ ශරීරයේ අභ්‍යන්තර ඔරලෝසුව (Circadian Rhythm) නිසි ලෙස සකස් කරගැනීමට නින්දට යන වේලාව සහ අවදි වන වේලාව ස්ථාවරව පවත්වා ගැනීම ඉතා වැදගත් වේ.

අපගේ අභ්‍යන්තර ඔරලෝසුව පාලනය කරන ප්‍රධානතම සාධකය වන්නේ ස්වාභාවික ආලෝකයයි.

රාත්‍රී කාලයේදී අඳුරු තිර භාවිත කරමින් ආලෝකය අවම කිරීම මගින් ශරීරයට මෙලටොනින් (Melatonin) හෝමෝනය නිපදවීමට සංඥා කරන අතර, උදෑසන දීප්තිමත් ආලෝකය ලැබීමට සැලැස්වීමෙන් කෝටිසෝල් (Cortisol) හෝමෝනය වර්ධනය වී ශරීරය අවදියෙන් තැබීමට උපකාරී වෙනවා.

ඊට අමතරව, නින්දට පැය දෙකකට පෙර සුවපහසු දෛනික චර්යාවකට හුරු වීම සහ කාමරයේ උෂ්ණත්වය පහත මට්ටමක පවත්වා ගැනීම ද සුවදායී නින්දකට මග පාදනවා.

නින්දට ඇති විශාලතම බාධාව වන්නේ රාත්‍රී කාලයේ ස්මාර්ට් ජංගම දුරකතන භාවිතයයි.

තිරවලින් නිකුත් වන නිල් පැහැති ආලෝකය මෙන්ම සමාජ මාධ්‍ය පරිශීලනය මගින් ලැබෙන ඩොපමයින් උත්තේජනය නිසා නින්ද ප්‍රමාද වන බව සොයාගෙන තිබෙනවා.

එම නිසා නින්දට යාමට පෙර ජංගම දුරකතන භාවිතය සීමා කිරීම, කැෆේන් සහ මත්පැන් පානයෙන් වැළකීම මෙන්ම නින්දට පැය 3කට පෙර රාත්‍රී ආහාරය ලබා ගැනීම මගින් alarm එකක් නොමැතිව ස්වභාවිකවම නිසි වේලාවට අවදි වන සෞඛ්‍ය සම්පන්න ශරීර රටාවක් නිර්මාණය කරගන්න ඔබටත් පුළුවන්..

මූලාශ්‍රය : බීබීසී පුවත්..