ශ්‍රී ලංකාවත් අභ්‍යවකාශ තාක්ෂණය දෙසට.. ඉතිහාසයේ පළමුවරට 'ජාතික අභ්‍යවකාශ ප්‍රතිපත්තියක්' හදන්න කැබිනට් අනුමැතිය.|Hiru TV Blog

ශ්‍රී ලංකාවත් අභ්‍යවකාශ තාක්ෂණය දෙසට.. ඉතිහාසයේ පළමුවරට 'ජාතික අභ්‍යවකාශ ප්‍රතිපත්තියක්' හදන්න කැබිනට් අනුමැතිය.

Wednesday, 20 May 2026 - 14:59 | Views - 252

ශ්‍රී ලංකාවේ ආපදා කළමනාකරණය, සන්නිවේදනය, ජාතික ආරක්ෂාව, පාරිසරික සුපරීක්ෂණය හා ආර්ථික නවෝත්පාදනය වැනි අතිශය තීරණාත්මක ක්ෂේත්‍ර රැසක් සඳහා අභ්‍යවකාශ තාක්ෂණය (Space Technology) ඵලදායී ලෙස යොදාගැනීමේ ඓතිහාසික පියවරක් තබා තිබෙනවා.

ඒ අනුව ශ්‍රී ලංකාව වෙනුවෙන් නිල 'ජාතික අභ්‍යවකාශ ප්‍රතිපත්තියක්' (National Space Policy) සම්පාදනය කිරීම සඳහා අමාත්‍ය මණ්ඩලයේ නිල අනුමැතිය මේ වනවිට හිමිවෙලා තිබෙනවා.

අභ්‍යවකාශ තාක්ෂණයේ පවතින උපාය මාර්ගික හා ආර්ථික වැදගත්කම දීර්ඝ ලෙස සලකා බැලීමෙන් අනතුරුව, විද්‍යා හා තාක්ෂණ අමාත්‍යාංශය විසින් මේ සුවිශේෂී පියවර ගෙන තිබෙනවා.

මේ නව ජාතික ප්‍රතිපත්තිය හරහා මෙරට සන්නිවේදන හා ආරක්ෂක ක්ෂේත්‍රයන්හි දැවැන්ත නවීකරණයක් සිදු කිරීමට අපේක්ෂිතයි. මෙහි ප්‍රධාන අරමුණු කිහිපයක් මෙලෙස පෙළගස්වා තිබෙනවා.

ස්වභාවික ආපදා කල්තියා හඳුනාගැනීම සහ පාරිසරික සුපරීක්ෂණ කටයුතු ශක්තිමත් කිරීම.

ජාත්‍යන්තර අභ්‍යවකාශ සහයෝගිතාවයන් වඩාත් විධිමත් මට්ටමකට රැගෙන යාම.

ගෝලීය අභ්‍යවකාශ පාලන යාන්ත්‍රණයන් තුළ ශ්‍රී ලංකාවේ දායකත්වය සහ ඵලදායිතාව ඉහළ නැංවීම.

මෙරට තුළ සිදු කෙරෙන සියලුම අභ්‍යවකාශ ක්‍රියාකාරකම් ජාත්‍යන්තර බැඳීම්, ගිවිසුම් හා ගෝලීය ප්‍රමිතීන්ට අනුකූලව සිදුවන බව සහතික කිරීම.

ලෝකයේ දියුණු රටවල් භාවිත කරන තාක්ෂණික ක්‍රමවේදයන්ට ගැළපෙන පරිදි, මේ ජාතික අභ්‍යවකාශ ප්‍රතිපත්තිය අතිශය සාර්ථකව සම්පාදනය කිරීම සඳහා විශේෂිත තාක්ෂණික දැනුමකින් හෙබි ඉහළ පෙළේ "විශේෂඥ කමිටුවක්" පත් කිරීමට ද රජය තීරණය කර තිබෙනවා.

විද්‍යා හා තාක්ෂණ අමාත්‍යවරයා විසින් කැබිනට් මණ්ඩලය වෙත ඉදිරිපත් කරන ලද මේ සුවිශේෂී යෝජනාව, ශ්‍රී ලංකාව ඩිජිටල් හා උසස් තාක්ෂණික ආර්ථිකයක් කරා රැගෙන යන නව මාවතක ආරම්භයක් වනු ඇති බව ආර්ථික හා තාක්ෂණික විශ්ලේෂකයන් පෙන්වා දුන්නා.