නෙප්චූන්ටත් එහා මොකක්ද තියෙන්නේ? සෞරග්‍රහ මණ්ඩලයේ සැඟවුණු 9 වැන්නා.|Hiru TV Blog

නෙප්චූන්ටත් එහා මොකක්ද තියෙන්නේ? සෞරග්‍රහ මණ්ඩලයේ සැඟවුණු 9 වැන්නා.

Saturday, 18 April 2026 - 14:49 | Views - 398

අපි පුංචි කාලේ ඉඳන්ම ඉගෙන ගත්තේ සෞරග්‍රහ මණ්ඩලයේ ග්‍රහලෝක 9ක් තියෙනවා කියලනේ.

හැබැයි 2006 දී ප්ලූටෝට තිබුණු "ග්‍රහලෝක" තත්ත්වය අහිමි වුණාට පස්සේ අපේ අසල්වැසි ප්‍රදේශයේ ඉතිරි වුණේ ග්‍රහලෝක 8ක් විතරයි.

හැබැයි අලුත්ම ආරංචි විදිහට, ඇත්තටම අපිට තවමත් හමු නොවුණු, අභිරහස් "නව වන ග්‍රහලෝකයක්" සෞරග්‍රහ මණ්ඩලයේ කෙළවරක සැඟවිලා තිබෙනවා.

මේ අභිරහස විසඳන්න දැන් විද්‍යාඥයෝ හරිම ආසන්නයි කියලා තමයි තොරතුරු වාර්තා වෙන්නේ.

මේ කතාව මුලින්ම කරළියට ආවේ 2016 දී කැලිෆෝනියා තාක්ෂණ ආයතනයේ (Caltech) විද්‍යාඥයින් දෙදෙනෙක් වුණු කොන්ස්ටන්ටින් බැටිජින් හා මයිකල් බ්‍රවුන් නිසයි.

ඔවුන් කියන්නේ නෙප්චූන්ට එහායින් තියෙන "කයිපර් තීරයේ" අයිස් සහිත වස්තූන් කිහිපයක් හරිම අමුතු විදිහට ගමන් කරනවා කියලා.

මේ වස්තූන්ගේ ගමන් මඟ මෙච්චර අමුතු වෙන්න නම්, අනිවාර්යයෙන්ම ඒ අසල පෘථිවිය වගේ 10 ගුණයක් විතර ස්කන්ධය තියෙන ලොකු ග්‍රහලෝකයක් තියෙන්නම ඕනේ කියලා ඔවුන් ගණිතමය වශයෙන් පෙන්වා දෙනවා.

මෙච්චර ලොකු ග්‍රහලෝකයක් ඇයි අපිට පේන්නේ නැත්තේ? ඒකට හේතුව තමයි මේක සූර්යයාගේ ඉඳන් නෙප්චූන්ට වඩා 20 ගුණයක් විතර ඈතින් තමයි තිබෙන්නේ.

ඒ තරම් ඈතකදී ආලෝකය හරිම අඩුයි. ඒ නිසා සාමාන්‍ය දුරේක්ෂවලට මේක අහුවෙන්නේ නැහැ.

හැබැයි චිලී රාජ්‍යයේ කඳු මුදුනක තියෙන වේරා රූබින් (Vera Rubin) නිරීක්ෂණාගාරය දැන් වැඩ පටන්අරන් තිබෙනවා. ලෝකයේ තියෙන විශාලතම ඩිජිටල් කැමරාවෙන් සමන්විත මේ නිරීක්ෂණාගාරයට පුළුවන් මුළු අහසම ඉතාම සූක්ෂ්ම විදිහට පරීක්ෂා කරන්න.

විද්‍යාඥයෝ විශ්වාස කරන්නේ තව අවුරුද්දක් හෝ දෙකක් ඇතුළත මේ නවවන ග්‍රහලෝකය අපේ ඇස් ඉදිරිපිටටම ගේන්න වේරා රූබින්ට පුළුවන් වෙයි කියලා.

සමහර විද්‍යාඥයෝ නම් තාමත් මේ ගැන සැක පළකරනවා. ඔවුන් කියන්නේ වසර බිලියන ගණනකට කලින් සෞරග්‍රහ මණ්ඩලය අසලින් ගිය තවත් දැවැන්ත තරුවක ගුරුත්වාකර්ෂණ බලය නිසා මේ වස්තූන්ගේ ගමන් මඟ වෙනස් වුණා මිසක්, එතන වෙනත් ග්‍රහලෝකයක් නැහැ කියලයි.

කොහොම වුණත්, මේ අභිරහස විසඳන්න දැන් අපි හරිම ආසන්නයි. මේක ඇත්තටම තිබුණොත්, ඒක අවුරුදු 180කට පස්සේ සෞරග්‍රහ මණ්ඩලයෙන් අපිට හමුවෙන පළමු දැවැන්ත ග්‍රහලෝකය වේවි.