සඳ වටා ගිය ඓතිහාසික ගමන නිමාවෙයි! සඳ ජයගත් Artemis II වීරයෝ සුරක්ෂිතව පෘථිවියට..|Hiru TV Blog

සඳ වටා ගිය ඓතිහාසික ගමන නිමාවෙයි! සඳ ජයගත් Artemis II වීරයෝ සුරක්ෂිතව පෘථිවියට..

Saturday, 11 April 2026 - 10:02 | Views - 369

මීට වසර 54කට කලින් තිබුණු ඇපලෝ මෙහෙයුම්වලින් පස්සේ, මිනිසුන් රැගත් යානයක් සඳ ආසන්නයට ගිය ඓතිහාසික 'ආටෙමිස් 2' (Artemis II) මෙහෙයුම ඉතාමත් සාර්ථකව අවසන් වුණා.

පසුගිය අප්‍රේල් 1 වැනිදා සඳ බලා පිටත් වුණු ගගනගාමීන් සිව්දෙනා, දින 10ක අභ්‍යවකාශ සංචාරයකින් පස්සේ අද අලුයම කැලිෆෝනියාවට ඔබ්බෙන් වූ පැසිෆික් සාගරයට ආරක්ෂිතව ගොඩබැස්සා.

මේ වන විට එම ගගනගාමීන් සිව්දෙනාව සෞඛ්‍ය පරීක්ෂණ හා නිරෝධායනය සඳහා යොමු කරලා තිබෙනවා.

මෙම ගමනේදී ගගනගාමීන් සඳ මත පය තැබුවේ නැහැ. ඒ වෙනුවට ඔවුන් කළේ 'ඔරියොන්' නම් යානය ඇතුළේ ඉඳගෙන සඳ වටා ගමන් කරමින්, සඳේ අපිට නොපෙනෙන අඳුරු පැත්ත ගවේෂණය කිරීමයි.

මෙහිදී ඔවුන් විශේෂ වාර්තාවක්ද තැබුවා. ඒ තමයි, 1970 වසරේ 'ඇපලෝ 13' කණ්ඩායම පෘථිවියේ සිට ගමන් කර තිබූ දුර ප්‍රමාණය වන කිලෝමීටර 400,171 ක් අභිබවා තවත් කිලෝමීටර 6,607ක් ඈතට ගමන් කිරීම. ඒ අනුව ඉතිහාසයේ පෘථිවියේ සිට වැඩිම දුරක් අභ්‍යවකාශයට ගිය මිනිසුන් බවට මොවුන් පත්වුණා.

යානය පෘථිවියට ඇතුළු වෙද්දී පැයට කිලෝමීටර 38,000ක වැනි ඉතා අධික වේගයකින් පැමිණියත්, එය පාලනය කරමින් සාගරයට පතිත කරවීමට ගගනගාමීන් සමත් වුණා.

සඳේ පිටුපස ප්‍රදේශයට යානය ගිය අවස්ථාවේදී පෘථිවිය සමඟ තිබූ සබඳතාව මිනිත්තු 40කට පමණ විසන්ධි වුණත්, ඒ සියලු බාධක ජයගෙන ඔවුන් නැවත පැමිණීම මුළු ලෝකයේම අවධානය දිනාගත් විශේෂ සිදුවීමක්.

ඉදිරි වසර කිහිපය තුළ නැවතත් මිනිසුන් සඳ මතට ගොඩබැස්වීමේ මෙහෙයුමට මේ සාර්ථකත්වය විශාල පිටුවහලක් වේවි කියලා විශ්වාස කරනවා.