ෆෙරාරි ප්‍රථම විද්‍යුත් මෝටර් රථය වන 'Elettrica' තාක්ෂණය ගැන ලොවටම හෙළිකරයි..|Hiru TV Blog

ෆෙරාරි ප්‍රථම විද්‍යුත් මෝටර් රථය වන 'Elettrica' තාක්ෂණය ගැන ලොවටම හෙළිකරයි..

Tuesday, 14 October 2025 - 12:08 | Views - 357

ඉතාලියේ සුඛෝපබෝගී ක්‍රීඩා මෝටර් රථ නිෂ්පාදක ෆෙරාරි (RACE.MI) සිය දැඩි අපේක්ෂාවෙන් යුතුව සිටි ප්‍රථම විද්‍යුත් මෝටර් රථය වන 'Elettrica' බලගන්වන තාක්ෂණය එළිදක්වා තිබෙනවා.

වසර 78ක් පැරණි මෙම සමාගම සිය දෙමුහුන් සහ පෙට්‍රල් එන්ජින් මාදිලීන්ට බැටරි බලය එක් කිරීමටයි බලාපොරොත්තු වෙන්නේ.

මැරනෙලෝ (Maranello) හි පිහිටි සිය ප්‍රධාන කාර්යාලයේ පැවති රහසිගත උත්සවයකදී, ෆෙරාරි රතු පැහැති ආවරණයක් ඉවත් කිරීමෙන් අනතුරුව, 'Elettrica' හි නිෂ්පාදනයට සූදානම් chassis (පදනම): එනම් බැටරි පැක් එක සහ විද්‍යුත් මෝටරය සහිත මෝටර් රථ පදනම එළිදැක්වූ අතර, එහි රෝද හෝ පිටත කවරය ඇතුළත් කර නොතිබුණු බවයි විදෙස් මාධ්‍ය සඳහන් කරන්නේ.

ෆෙරාරි සමාගම ලබන වසරේදී ගෝලීය වශයෙන් එළිදැක්වීමට අපේක්ෂා කරන මෙම සම්පූර්ණ කරන ලද මෝටර් රථයේ උපරිම වේගය පැයට කිලෝමීටර් 310 (සැතපුම් 193)ක් වනු ඇති.

මෙය එහි බොහෝ එන්ජින් මාදිලීන්ට වඩා තරමක් අඩු වේගයක්.

තවද, මෙම මෝටර් රථයේ ගමන් කළ හැකි පරාසය කිලෝමීටර් 530කට වඩා වැඩි වනු ඇති බවටයි සඳහන් වෙන්නේ.

දොරවල් හතරක් සහිත ආසන හතරක් හෝ ඊට වැඩි ආසන සංඛ්‍යාවක් ඇති මෝටර් රථයේ, සැබෑ එන්ජින් ශබ්දයක් අනුකරණය කරනවා වෙනුවට, විද්‍යුත් බල පද්ධතියෙන් (powertrain) ඇතිවන සැබෑ කම්පන විස්තාරණය කිරීම සඳහා විශේෂයෙන් නිර්මාණය කරන ලද ශබ්ද පද්ධතියක් ඇතුළත්වනු ඇති.

එමගින් ෆෙරාරි සන්නාමයටම ආවේණික වූ විද්‍යුත් ශබ්දයක් නිර්මාණය කිරීමට අපේක්ෂා කරන බවයි සඳහන් වෙන්නේ.

රොයිටර් පුවත් සේවය වාර්තා කළේ, මෙම රථය සඳහා අවම වශයෙන් යුරෝ 500,000ක් ($580,400) වැය කිරීමට අපේක්ෂා කරන බවයි.

ෆෙරාරි සිය ප්‍රථම දෙමුහුන් (Hybrid) තාක්ෂණය 2009 වසරේදී ෆෝමියුලා වන් (Formula One) රථවලට හඳුන්වා දුන් අතර, 2019 දී දෙමුහුන් මාදිලි විකිණීම ආරම්භ කළා.

'Elettrica' පැමිණෙන්නේ ඊට දශක දෙකකට ආසන්න කාලයකට පසුවයි.

'Elettrica' හි චැසිය (chassis) සහ බඳ සියයට 75ක් ප්‍රතිචක්‍රීයකරණය කරන ලද ඇලුමිනියම්වලින් නිපදවීමට නියමිත අතර, එමගින් එක් වාහනයකින් CO2 ටොන් 6.7ක පමණ ඉතිරියක් ලැබෙන බවට සඳහන්.

බැටරිය සම්පූර්ණයෙන්ම මෝටර් රථයේ බිම කොටසට ඒකාබද්ධ කර ඇති අතර, එමගින් රථයේ ගුරුත්වාකර්ෂණ කේන්ද්‍රය පහත හෙළා කාර්ය සාධනය සහ වේගය වැඩි දියුණු කිරීමට උපකාරී වෙනවා.