සියදිවි නසා ගැනීමට මුල් වූ රුවන් ප්‍රසාද්ගේ දේශන පැවැත්වූ ප්‍රදේශ හඳුනා ගැනෙයි|Hiru TV Blog

සියදිවි නසා ගැනීමට මුල් වූ රුවන් ප්‍රසාද්ගේ දේශන පැවැත්වූ ප්‍රදේශ හඳුනා ගැනෙයි

Thursday, 04 January 2024 - 7:57 | Views - 1,244

බිරිඳ, දරුවන් ඇතුලු පුද්ගලයන් 6 දෙනෙකු සිය දිවි නසා ගැනීමට මුල් වූ බවට පැවසෙන මියගිය රුවන් ප්‍රසන්න ගුණරත්න නැමත්තා විසින් දිවයිනේ ප්‍රදේශ කිහිපයක ආගමික දේශන පවත්වා ඇති බවට අනාවරණය වී තිබෙනවා.

ගාල්ල, අනුරාධපුර සහ කුරුණෑගල යන දිස්ත්‍රික්කවල ඔහු විසින් මෙම ආගමික දේශන පවත්වා ඇති බවටයි මේ වන විට අනාවරණය වී ඇත්තේ.

මාලඹේ - කහන්තොට ප්‍රදේශයේදී මෙම පුද්ගලයා වස පානය කර සිය දිවි නසා ගත් අතර ඔහුගේ බිරිඳ සහ දරුවන් තිදෙනාගේ මෙන්ම ආගමික දේශනවලට සහභාගී වූ තවත් දෙදෙනෙකු වස පානය කර සියදිවි හානි කර ගෙන තිබුණා.

කොට්ටාව - මාකුඹුර ප්‍රදේශයේ මහල් නිවාසයක ජීවත්ව සිටි 46 හැවිරිදි රුවන් ප්‍රසන්න ගුණරත්න නැමති මෙම පුද්ගලයා පසුගිය 28 වනදා වස පානය කර සියදිවි හානිකරගත් අතර ඔහුගේ අවසන් කටයුතුවලින් පසු බිරිඳ සහ දරුවන් තිදෙනාද වස පානය කර සියදිවි හානිකරගෙන තිබුණේ මාලඹේ - කහන්තොට ප්‍රදේශයේදීයි.

කෙසේ වෙතත් පසුව අනාවරණය වූයේ රුවන් ප්‍රසන්න ගුණරත්න නැමති මෙම පුද්ගලයා ආගමික දේශන පවත්වන පුද්ගලයෙකු බවටයි.

එහෙත් ඔවුන්ගේ සියදිවි හානිකර ගැනීමට හේතුවක් ද එම අවස්ථාවේදී අනාවරණය වී තිබුණේ නැහැ.

මේ අතර මහරගම දුම්රියපොළ පාර ප්‍රදේශයේ ලැඟුම්හලක තිබී වස පානය කර සියදිවි නසා ගත් පුද්ගලයෙකුගේ සිරුරක් ඊයේ (03) පොලිසිය සොයා ගෙන තිබුණා.

අම්බලන්ගොඩ වතුගෙදර ප්‍රදේශයේ පදිංචි 34 හැවිරිදි පුද්ගලයෙකුයි මෙලෙස සියදිවි හානි කර ගෙන තිබුණේ.

එමෙන්ම යක්කල - රාපල්වත්ත ප්‍රදේශයේ පදිංචි 21 හැවිරිදි තරුණියක්ද වස පානය කර ගෙන සියදිවි හානි කර ගෙන තිබුණා.

පොලිසිය දැනට අනාවරණය කර ගෙන ඇත්තේ මෙම දෙදෙනාම රුවන් ප්‍රසන්න ගුණරත්න නැමති පුද්ගලයාගේ දේශනවලට සහභාගී වූ පුද්ගලයින් බවටයි.

එමෙන්ම ඔවුන් රුවන් ප්‍රසන්න ගුණරත්න නැමැත්තාගේ අවමගුල් කටයුතුවලටද සහභාගී වී තිබෙනවා.

කෙසේ වෙතත් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව සඳහන් කළේ රුවන් ප්‍රසන්න ගුණරත්නගේ දේශනාවලට සහභාගී වූ අය තම නිවෙස්වල සිටින්නේනම් ඔවුන් පිළිබඳ අවධානයෙන් සිටින ලෙසයි.

Share This Article