ක්‍රිප්ටෝ ඉතිහාසයේ දැවැන්තම ප්‍රහාරයෙන් පසු Binance ගත් පෙරළිකාර තීරණය.. අලාභය පියවීමට කෝටි ගණනක අරමුදල් ලෑස්ති කරයි..|Hiru TV Blog

ක්‍රිප්ටෝ ඉතිහාසයේ දැවැන්තම ප්‍රහාරයෙන් පසු Binance ගත් පෙරළිකාර තීරණය.. අලාභය පියවීමට කෝටි ගණනක අරමුදල් ලෑස්ති කරයි..

Friday, 30 October 2026 - 19:09 | Views - 37

සයිබර් ප්‍රහාරයට ලක්වූ Binance ක්‍රිප්ටෝ හුවමාරු ආයතනය, එම සිදුවීමෙන් සිදු වූ සමස්ත අලාභය තමන්ගේම ආයතනික අරමුදල් මගින් පියවන බවට නැවතත් සහතික වී තිබෙනවා.

මේ වන විටත් සිදුවූ අලාභයට සමාන මුදලක් වන ඩොලර් බිලියන 6.3 කට අධික මුදලක් මේ සඳහා වෙන්කර ඇති බව එම ආයතනය නිකුත් කළ නවතම වාර්තාවක සඳහන් බවයි විදෙස් මාධ්‍ය වාර්තා කරන්නේ.

Binance ආයතනය නිකුත් කළ නිවේදනයේ සඳහන් වන අන්දමට, වෙන්කර ඇති ඩොලර් බිලියන 6.3 ක මුදලෙන් ඩොලර් බිලියන 5 ක්ම ප්‍රහාරයට ලක්වූ අදාළ ක්‍රිප්ටෝ ටෝකන (exact token assets) ආකාරයෙන්ම දැනටමත් රඳවාගෙන තිබෙනවා.

ඉතිරි අලාභය පියවීම සඳහා අවශ්‍ය වන අරමුදල් විවිධ මාර්ග ඔස්සේ මිලදී ගනිමින් සිටින අතර, ඒ සඳහා යම් කාලයක් ගතවිය හැකි බවත්, එහි ප්‍රගතිය හැකි ඉක්මනින් දැනුම් දෙන බවත් එම ආයතනය පවසන බවයි විදෙස් වාර්තාවේ දැක්වෙන්නේ.

ඉහත සඳහන් කළ ඩොලර් බිලියන 6.3 ක මුදලට, පරීක්ෂණ මගින් අත්හිටුවන ලද (frozen) දේපළ ඇතුළත් නොවන බවත්, එම මුදල් නැවත ලබාගැනීමේ සහ තහවුරු කිරීමේ ක්‍රියාවලිය තවදුරටත් සිදුවන බවත් Binance ආයතනය සඳහන් කර තිබෙනවා.

මූලාශ්‍රය - බීබීසී