කොළඹ තැනින් තැන මොණරුන් වඳුරන් මුවන් - විලෝපිකයන් බව වනජීවීන් කියයි|Hiru TV Blog

කොළඹ තැනින් තැන මොණරුන් වඳුරන් මුවන් - විලෝපිකයන් බව වනජීවීන් කියයි

Saturday, 10 October 2026 - 17:23 | Views - 32

කොළඹ ඇතුළු නාගරික ප්‍රදේශවලට මොණරන්, වඳුරන් සහ මුවන් වැනි වනජීවීන්ගේ පැමිණීම ක්‍රමයෙන් ඉහළ යමින් පවතින බව ප්‍රධාන ඉංග්‍රීසි පුවත්පතක් වාර්තා කර සිටිනවා.

වනජීවී සංරක්ෂණ දෙපාර්තමේන්තුවේ නිලධාරී හසිනි සරත්චන්ද්‍ර උපුටා දක්වමින් අදාළ පුවත්පත සඳහන් කරන්නේ, ස්වභාවික වාසස්ථාන අහිමිවීම, ස්වභාවික ආහාර දාමයන්හි බිඳ වැටීම සහ විලෝපිකයන්ගේ කරගන්නා ගහනය අඩුවීම මෙම තත්ත්වයට ප්‍රධාන වශයෙන්ම හේතු වී ඇති බවයි.

විශේෂයෙන්ම පහතරට තෙත් කලාපයේ සිදුවන කර්මාන්තකරණය, සංවර්ධන කටයුතු සහ පුළුල් වන මානව ජනාවාස හේතුවෙන් සතුන්ගේ ස්වභාවික වාසස්ථාන අහිමි වී ඇති අතර, ඒ නිසා සතුන් නාගරික ප්‍රදේශ වෙත ඇදී ඒම හරහා මිනිස්-වනජීවී ගැටුම් ඉහළ යෑමේ අවදානමක් ද මතුව තිබෙනවා.

මොනරුන්ගේ බිත්තර ආහාරයට ගන්නා නරියන් වැනි විලෝපිකයන්ගේ ගහනය අඩුවීම නිසා මොනරුන්ගේ ගහනය පාලනයකින් තොරව වර්ධනය වී ඇති බවත්, කෑගල්ල සහ කළුතර වැනි දිස්ත්‍රික්කවල ද වඳුරන් ජනාවාස වෙත පැමිණීම ඉහළ ගොස් ඇති බවත් එම වාර්තාවේ සඳහන්. එසේම, හෝමාගම වැනි ප්‍රදේශවල මුවන් වාර්තා වීම ඉහළ ගොස් ඇත්තේ මීට පෙර නිවෙසක ඇතිකිරීමට ගෙන ආ මුවන් කිහිපදෙනෙකුගේ ගහනය වර්ධනය වීමෙන් බවයි පෙන්වා දී ඇත්තේ.

මෙම තත්ත්වය හමුවේ සතුන් ආක්‍රමණශීලී ලෙස හැසිරීම හෝ සපාකෑමේ අවදානමක් ඇති අවස්ථාවලදී, කොළඹ, ගම්පහ, මුතුරාජවෙල සහ අත්තිඩිය යන ප්‍රාදේශීය වනජීවී කාර්යාල හරහා කඩිනම් පියවර ගන්නා බව වනජීවී දෙපාර්තමේන්තුව ප්‍රකාශ කර තිබෙනවා.

ඒ අනුව, මිනිසුන්ට උපද්‍රව කරන සතුන් අල්ලා සුදුසු වාසස්ථාන වෙත මුදා හැරීමටත්, තුවාල ලැබූ සතුන් අත්තිඩිය වනජීවී රෝහලෙන් ප්‍රතිකාර කිරීමෙන් පසු වියළි කලාපයේ ජාතික වනෝද්‍යාන වෙත මුදා හැරීමටත් කටයුතු කරන බවයි අදාළ පුවත්පත් වාර්තාවේ වැඩිදුරටත් දැක්වෙන්නේ.