කඩදාසි සංස්ථාවේ සභාපතිගේ කැබ් රථය සහ රියදුරු අතුරුදන්.. ගරාජ් එකට පෙන්නලා ඒ ගමන්ම අතුරුදහන් වෙලා..|Hiru TV Blog

කඩදාසි සංස්ථාවේ සභාපතිගේ කැබ් රථය සහ රියදුරු අතුරුදන්.. ගරාජ් එකට පෙන්නලා ඒ ගමන්ම අතුරුදහන් වෙලා..

Wednesday, 23 September 2026 - 16:39 | Views - 122

කඩදාසි සංස්ථාවේ සභාපතිවරයාගේ නිල කැබ් රථය සහ එහි සේවය කළ රියදුරුවරයා එකවරම අතුරුදන්ව ඇති බවට වැල්ලවත්ත පොලිස් ස්ථානය වෙත පැමිණිල්ලක් ලැබී තිබෙනවා.

කොළඹ 06 ස්ටැෆ්ඩ් පාරේ පිහිටි ප්‍රධාන කාර්යාලයේ සිට සභාපතිවරයාව කාර්යාලය වෙත කැඳවාගෙන ඒම සඳහා කඩවත පිහිටි ඔහුගේ නිවස බලා යමින් සිටියදී මෙලෙස රියදුරු අතුරුදන්ව ඇති බව පොලිසියට ලැබුණු පැමිණිල්ලේ සඳහන් වුණා.

නියමිත වේලාවට කැබ් රථය නිවසට නොපැමිණීම හේතුවෙන් සභාපතිවරයා විසින් දුරකථන ඇමතුමක් ලබා දී විමසීමේදී, රථයේ ඉන්ධන කාන්දුවක් ඇති බව රියදුරු විසින් පවසා තිබෙනවා.

ඒ අනුව කඩවත ප්‍රදේශයේ පිහිටි වාහන අලුත්වැඩියා කරන ස්ථානයකට රථය පෙන්වන ලෙස සභාපතිවරයා උපදෙස් ලබා දී ඇති අතර, රියදුරු එම ස්ථානයට ගොස් පරීක්ෂා කරද්දී කිසිදු දෝෂයක් නොමැති බව කාර්මිකයින් ප්‍රකාශ කර ඇති බව පසුව කළ විමර්ශනවලදී අනාවරණය වී තිබෙනවා.

කෙසේ වෙතත් සවස 04.00 වන තෙක් රියදුරු කාර්යාලයට නොපැමිණි අතර ඔහුගේ දුරකථනයද ක්‍රියා විරහිත කර තිබූ බැවින්, කඩදාසි සංස්ථාවේ ප්‍රවාහන කළමනාකරු වන සමන් ප්‍රියංකර ප්‍රනාන්දු විසින් මේ පිළිබඳව වැල්ලවත්ත පොලිසියට පැමිණිලි කර තිබෙනවා.

මෙලෙස අතුරුදන්ව ඇත්තේ රාගම, කැන්දලියද්දපාලුව ප්‍රදේශයේ පදිංචි 29 හැවිරිදි තරුණයෙක්.

සිද්ධිය සම්බන්ධයෙන් CCTV දර්ශන සහ දුරකථන විශ්ලේෂණ වාර්තා ඔස්සේ වැල්ලවත්ත පොලිසියේ ස්ථානාධිපති ප්‍රධාන පොලිස් පරීක්ෂක මොහාන් සිල්වාගේ උපදෙස් පරිදි විශේෂ පොලිස් කණ්ඩායමක් පරීක්ෂණ පවත්වනු ලබනවා.