අදත් මි.මී. 100ට වැඩි තද වැසි.. රට වටේටම බලපාන අයහපත් කාලගුණයේ නවතම තත්ත්වය..|Hiru TV Blog

අදත් මි.මී. 100ට වැඩි තද වැසි.. රට වටේටම බලපාන අයහපත් කාලගුණයේ නවතම තත්ත්වය..

Wednesday, 23 September 2026 - 13:01 | Views - 30

දිවයින පුරා ප්‍රදේශ රැසකට අද දිනයේත් මිලි මීටර 100ට වැඩි තද වැසි ඇති විය හැකි බවට කාලගුණ විද්‍යා දෙපාර්තමේන්තුව විසින් හදිසි නිවේදනයක් නිකුත් කරමින් සඳහන් කළා.

ඒ අනුව බස්නාහිර, සබරගමුව, මධ්‍යම සහ වයඹ පළාත්වලත්, ගාල්ල සහ මාතර දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති විය හැකියි.

ඊට අමතරව මධ්‍යම කඳුකරයේ බටහිර බෑවුම් ප්‍රදේශවලත්, උතුරු මැද සහ වයඹ පළාත්වලත්, ත්‍රිකුණාමලය සහ හම්බන්තොට දිස්ත්‍රික්කවලත් විටින් විට පැයට කිලෝමීටර 40ත් 50ත් අතර තද සුළං ඇතිවීමේ හැකියාවක් පවතිනවා.

මේ අතර බෙංගාල බොක්ක මුහුදු ප්‍රදේශයේ ගිගුරුම් සහිත තද වැසි ඇතිවිය හැකි අතර, සුළගේ වේගය පැයට කිලෝමීටර 70 දක්වා ක්ෂණිකව ඉහළ යාමට ඉඩ ඇති බව වාර්තා වුණා.

මේ හේතුවෙන් එම මුහුදු ප්‍රදේශ ඉතා රළු විය හැකි බැවින්, නැවත දැනුම් දෙනතුරු අදාළ මුහුදු ප්‍රදේශවල ධීවර කටයුතුවලින් සම්පූර්ණයෙන්ම වැළකී සිටින ලෙස කාලගුණ විද්‍යා දෙපාර්තමේන්තුව ධීවර ප්‍රජාවගෙන් ඉල්ලා සිටිනවා.

එමෙන්ම මේ වන විටත් එම මුහුදු ප්‍රදේශවල ධීවර කටයුතුවල යෙදී සිටින පිරිස් වෙතොත් වහාම ඉන් ඉවත් වන ලෙස වැඩිදුරටත් දැනුම් දුන්නා.