අවුරුදු 132ක් ප්‍රමාද වූ සඟරාවක් නැවත ලැබුණු පුස්තකාලය.. අමෙරිකාවේ කොන්කෝඩ් පුස්තකාලයම කැළඹූ සිදුවීම..|Hiru TV Blog

අවුරුදු 132ක් ප්‍රමාද වූ සඟරාවක් නැවත ලැබුණු පුස්තකාලය.. අමෙරිකාවේ කොන්කෝඩ් පුස්තකාලයම කැළඹූ සිදුවීම..

Monday, 21 September 2026 - 15:04 | Views - 31

වසර 132කට පෙර, එනම් 1894 වසරේදී ලබාගත් සඟරාවක් අමෙරිකාවේ නිව් හැම්ප්ෂයර් හි පිහිටි ප්‍රකට කොන්කෝඩ් මහජන පුස්තකාලය (Concord Public Library) වෙත නැවත භාරදීමේ අපූරු පුවතක් වාර්තා වුණා.

'The Century Illustrated Monthly Magazine' නමැති මෙම සඟරාවේ 1894 සැප්තැම්බර් කලාපය මෙලෙස නැවත භාරදී තිබෙන්නේ නියමිත දින සිට දින 48,220ක් තරම් දීර්ඝ කාලයක් ප්‍රමාද වීමෙන් පසුවයි.

සාමාන්‍ය දඩ මුදල් ක්‍රමය අනුව නම් මෙම සඟරාව වෙනුවෙන් අමෙරිකානු ඩොලර් 12,055ක (පවුම් 8,950ක පමණ) දැවැන්ත දඩයක් අයවිය යුතුව තිබුණා.

ජෝන් නමැති පුද්ගලයෙකු විසින් මෙම සඟරාව පුස්තකාලයට භාරදී ඇති අතර, දශක ගණනාවක් තිස්සේ මෙම සඟරාව තමාගේ නිවසේ තිබුණද එය නිවසට ආවේ කෙසේදැයි තමා නොදන්නා බව ඔහු පවසා තිබෙනවා.

මාද දඩ මුදල් අහෝසි කිරීමේ විශේෂ සහන කාලයක් ප්‍රකාශයට පත් කරමින් පුවත්පතක පළ වූ වාර්තාවක් දැකීමෙන් පසුව ඔහු මෙය නැවත භාරදීමට තීරණය කර තිබෙනවා.

"දඩ නැති පුස්තකාලයක" ප්‍රයෝජන අධ්‍යයනය කිරීම සඳහා කොන්කෝඩ් මහජන පුස්තකාලය විසින් 2026 සැප්තැම්බර් 01 වැනිදා සිට වසරක කාලයක් සඳහා ප්‍රමාද දඩ අහෝසි කිරීමේ සහන කාලයක් ලබාදී තිබුණා.

ප්‍රමාද වූ පොත් ලැබෙනු ඇතැයි අපේක්ෂා කළත් 19 වන සියවස අගභාගයේ සඟරාවක් ලැබෙතැයි කිසිසේත්ම උපකල්පනය නොකළ බව මේ පිළිබඳව ෆේස්බුක් හි සටහනක් තබමින් පුස්තකාල පාලනාධිකාරිය සඳහන් කළා.

කෙසේ වෙතත්, මෙම දුර්ලභ සඟරාව නැවත සාමාන්‍ය පරිශීලනය සඳහා නිකුත් නොකරන අතර, එය ප්‍රදේශයේ ඓතිහාසික තොරතුරු වෙනුවෙන් වෙන් කර ඇති පුස්තකාලයේ 'කොන්කෝඩ් කුටිය' (Concord Room) හි තැන්පත් කිරීමට පියවර ගෙන තිබෙනවා.