බොලිවියාවේ වනාන්තරයකින් හමුවූ නව වල් බළල් විශේෂය.. මුළු බළල් පවුලේම ඉතිහාසය වෙනස් කළ 'ටිග්‍රිනෝ'..|Hiru TV Blog

බොලිවියාවේ වනාන්තරයකින් හමුවූ නව වල් බළල් විශේෂය.. මුළු බළල් පවුලේම ඉතිහාසය වෙනස් කළ 'ටිග්‍රිනෝ'..

Saturday, 19 September 2026 - 16:38 | Views - 76

බොලිවියාවේ ඝන වනාන්තර ප්‍රදේශයකින් නව වල් බළල් විශේෂයක් (Wild Cat Species) සොයාගැනීමට විද්‍යාඥයන් සමත්ව තිබෙනවා.

සාමාන්‍ය ගෘහස්ථ බළලෙකුගේ ප්‍රමාණයට සමාන මෙම සත්ත්වයා 'ලියෝපාර්ඩස් ටිල්කායෝ' (Leopardus tilcayo) ලෙස නම් කර තිබෙනවා.

අනෙකුත් වල් බළලුන්ගේ සමීප ලක්ෂණ සහ රටාවන් පැවතීම නිසා මින් පෙර මෙම විශේෂය වෙනත් සතුන් ලෙස වරදවා වටහාගෙන තිබුණද, මෑතකදී සිදු කරන ලද DNA පරීක්ෂණ මගින් මෙය සම්පූර්ණයෙන්ම වෙනස් නව විශේෂයක් බව තහවුරු වී තිබෙනවා.

විශේෂම කාරණය වන්නේ මෙම නව විශේෂයට අයත් ලොව දැනට ජීවත්ව සිටින එකම එක සත්ත්වයෙකු පමණක් බොලිවියාවේ වනජීවී රක්ෂිතයක රැඳී සිටීමයි.

'ටිග්‍රිනෝ' (Tigrino) ලෙස අන්වර්ථ නාමයෙන් හඳුන්වන වයස අවුරුදු 10ක් වන මෙම බළලා මුලදී දේශීය ගෘහස්ථ බළල් පැටවෙකු ලෙස සිතා ප්‍රදේශයේ පදිංචිකරුවෙකුට හමුවී ඇති අතර, සත්ත්වයා වැඩෙත්ම එහි හැසිරීම් රටා වෙනස් වීමත් සමග විද්‍යාඥයන්ගේ අවධානය ඒ වෙත යොමුවී තිබෙනවා.

'Current Biology' සඟරාවේ පළ කරන ලද මෙම නව අධ්‍යයනයට අනුව, ටයිගර් කැට් (Tiger Cat) කාණ්ඩයට අයත් විශේෂ සංඛ්‍යාව තුනේ සිට පහ දක්වා ඉහළ ගොස් තිබෙනවා.

වනාන්තර එළිපෙහෙලි කිරීම්, වාසභූමි අහිමි වීම් සහ නීති විරෝධී දඩයම් කිරීම් හේතුවෙන් මෙම සතුන් වඳ වී යාමේ දැඩි තර්ජනයට මුහුණ දී සිටින බව පෙන්වා දෙන පර්යේෂකයෝ, මෙම සොයාගැනීමත් සමඟ ලොව පුරා පිළිගත් සමස්ත බළල් විශේෂ (Felidae Family) සංඛ්‍යාව 41 සිට 44 හෝ 45 දක්වා ඉහළ යනු ඇති බවද සඳහන් කරනවා.