හෙල්ලයේ එල්ලයෙන් මෙරට නාමය බැබලවූ රුමේෂ් තරංග ලොව හොඳම මලල ක්‍රීඩකයන් අතර 13 වැනි තැනට..|Hiru TV Blog

හෙල්ලයේ එල්ලයෙන් මෙරට නාමය බැබලවූ රුමේෂ් තරංග ලොව හොඳම මලල ක්‍රීඩකයන් අතර 13 වැනි තැනට..

Friday, 18 September 2026 - 14:52 | Views - 85

හෙල්ල විසිකිරීමේ ඉසව්වෙන් ශ්‍රී ලංකා නාමය ලොවක් ඉදිරියේ බැබලවූ ප්‍රමුඛ පෙළේ මලල ක්‍රීඩක රුමේෂ් තරංග, ලෝක මලල ක්‍රීඩා සංගමයේ (World Athletics) නවතම ශ්‍රේණිගත කිරීම් ලැයිස්තුව තුළ තවත් ඉදිරියට පැමිණීමට සමත්ව තිබෙනවා.

එම සංගමය මගින් සිදුකරන ලද නවතම යාවත්කාලීන කිරීමට අනුව, ලොව සියලුම මලල ක්‍රීඩකයින් ඇතුළත් සමස්ත පොදු කාණ්ඩය (Overall World Ranking) තුළ රුමේෂ් තරංග මීට පෙර රැඳී සිටි 25 වැනි ස්ථානයේ සිට 13 වැනි ස්ථානය දක්වා දැවැන්ත පිම්මක් ලබා ගැනීමට සමත් වී තිබීම විශේෂත්වයක්.

මෙම පොදු කාණ්ඩය තුළ සමස්ත ආසියාවෙන්ම ඉහළින්ම රැඳී සිටින එකම ආසියානු මලල ක්‍රීඩකයා බවට පත්වීමට ද රුමේෂ්ට හැකියාව ලැබී තිබෙනවා.

එමෙන්ම හෙල්ල විසිකිරීමේ (Javelin Throw) විශේෂිත ඉසව්ව වෙනුවෙන් වෙන් වූ ලෝක ශ්‍රේණිගත කිරීම්හි තවදුරටත් ලොව අංක එකේ ක්‍රීඩකයා (World No. 1) ලෙස තම සුපිරි ස්ථානය රැකගැනීමට ද රුමේෂ් තරංග සමත් වුණා.

එහි දෙවැනි ස්ථානය ග්‍රෙනේඩාවේ ඇන්ඩර්සන් පීටර්ස්ටත්, තුන්වැනි ස්ථානය ජර්මනියේ ජූලියන් වෙබර්ටත් හිමිව ඇති අතර, රුමේෂ් තැබූ මෙම ජාත්‍යන්තර දක්ෂතාව මෙරට ක්‍රීඩා ඉතිහාසයට එක්වූ තවත් රන්මය පරිච්ඡේදයක්.