අධ්‍යාපන ක්ෂේත්‍රයේ දැවැන්ත පෙරළියක් 2027දී.. සාමාන්‍ය පෙළ විභාගය විෂයයන් 7කට සීමා කිරීමට සැලසුම්..|Hiru TV Blog

අධ්‍යාපන ක්ෂේත්‍රයේ දැවැන්ත පෙරළියක් 2027දී.. සාමාන්‍ය පෙළ විභාගය විෂයයන් 7කට සීමා කිරීමට සැලසුම්..

Tuesday, 15 September 2026 - 10:08 | Views - 24

2027 වසරේ සිට ක්‍රියාත්මක කිරීමට නියමිත නව අධ්‍යාපන ප්‍රතිසංස්කරණවලට අනුව අධ්‍යයන පොදු සහතික පත්‍ර සාමාන්‍ය පෙළ විභාගය සඳහා ඉතිහාසය හා සෞන්දර්ය විෂයන් ඇතුළත්ව සමස්ත විෂයයන් සංඛ්‍යාව 7ක් දක්වා සීමා කිරීමට සැලසුම් කර තිබෙනවා.

අග්‍රාමාත්‍ය මෙන්ම අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය ආචාර්ය හරිනි අමරසූරියගේ ප්‍රධානත්වයෙන් පාර්ලිමේන්තුවේදී පැවැති අධ්‍යාපන ප්‍රතිසංස්කරණ පිළිබඳ අනුකාරක සභා රැස්වීමේදී මේ පිළිබඳව විශේෂ සාකච්ඡාවක් පැවැත්වූ බව පාර්ලිමේන්තු සන්නිවේදන දෙපාර්තමේන්තුව නිවේදනය කළා.

යෝජිත නව ප්‍රතිසංස්කරණ යටතේ සිදුකිරීමට නියමිත ප්‍රධාන වෙනස්කම් කිහිපයක් පිළිබඳවම මෙහිදී අවධානය යොමු කර තිබෙනවා.

ඒ අනුව විෂයයන් සංඛ්‍යාව 7කට සීමා කිරීමට අමතරව පාසල් සිසුන් උදෙසා 10 සහ 11 ශ්‍රේණිවල සිටම වෘත්තීය අධ්‍යාපනය හඳුන්වාදීමට පියවර ගන්නා අතර, ජ්‍යෙෂ්ඨ ද්විතියික අධ්‍යාපනය ලබන 12 සහ 13 ශ්‍රේණි සඳහා සමාජ සංහිඳියාව, නීතිය හා ආචාර ධර්ම යන වැදගත් මොඩියුලයන් ඇතුළත් කිරීමට නියමිතයි.

මෙම නව පද්ධතියේ ආරම්භක පියවරක් ලෙස 2 සහ 6 ශ්‍රේණි සඳහා අවශ්‍ය ක්‍රියාකාරකම් පොත්, ගුරු මාර්ගෝපදේශ සහ මොඩියුල මේ වන විටත් සාර්ථකව සකස් කර ඇති අතර ඊට අදාළ ගුරු පුහුණු වැඩසටහන් ද ක්‍රියාත්මක කිරීම ඇතුළු අනෙකුත් සියලු ප්‍රායෝගික කටයුතු මේ වන විටත් සංවිධානය වෙමින් පවතින බව මෙම රැස්වීමේදී වැඩිදුරටත් අනාවරණය වී තිබෙනවා.

Share This Article