ඊශ්‍රායල ප්‍රහාර මැද දකුණු ලෙබනනයට රික්ටර් මාපක 4.1ක භූ කම්පනයක්.. දැවැන්ත පිපිරීමක් නිසා පොළොව දෙදරා යයි..|Hiru TV Blog

ඊශ්‍රායල ප්‍රහාර මැද දකුණු ලෙබනනයට රික්ටර් මාපක 4.1ක භූ කම්පනයක්.. දැවැන්ත පිපිරීමක් නිසා පොළොව දෙදරා යයි..

Friday, 11 September 2026 - 18:42 | Views - 71

දකුණු ලෙබනනයේ අලි අල්-තාහර් ප්‍රදේශයේ රික්ටර් මාපක 4.1ක ප්‍රබලත්වයෙන් යුත් භූ කම්පන තත්ත්වයක් වාර්තා වී ඇති බව අමෙරිකානු භූ විද්‍යා සමීක්ෂණ ආයතනය (USGS) නිල වශයෙන් සඳහන් කර තිබෙනවා.

නබාතියේ ප්‍රදේශයේ අලි අල්-තාහර් කඳු වැටිය ආශ්‍රිතව ඊශ්‍රායල හමුදාව විසින් සිදුකරන ලද දැවැන්ත පිපිරීමක් හේතුවෙන් මෙම තත්ත්වය හටගෙන ඇති බව ලෙබනනයේ රාජ්‍ය පුවත් ඒජන්සිය වන NNA වාර්තා කර තිබෙනවා.

දකුණු ලෙබනනය පුරා ප්‍රබල පිපිරීම් රැසක් වාර්තා වූ අවස්ථාවේදී මෙලෙස භූ කම්පනයක්ද සටහන් වී ඇති බව විදෙස් මාධ්‍ය පෙන්වා දෙනවා.

එම ප්‍රහාරාත්මක පිපිරීමත් සමඟ ප්‍රදේශයේ කම්පන තත්ත්වයක් මෙන්ම කන් අගුළු වටෙන සුළු දැඩි පිපිරුම් හඬක් ද ඇති වූ බව සඳහන් වුණා.

දකුණු ලෙබනනයේ සිටින AFP ප්‍රංශ පුවත් සේවයේ මාධ්‍යවේදීන්ද එක පිට එක ඇසුණු දැවැන්ත පිපිරීම් හඬවල් කිහිපයක් පිළිබඳව වාර්තා කර තිබෙනවා.

විදෙස් මාධ්‍ය වාර්තා අනුව, අදාළ ප්‍රදේශයේ ත්‍රස්ත සංවිධානයකට අයත් කිලෝමීටර් දෙකකට වඩා වැඩි දුරක් පුරා විහිදී පැවති භූගත යටිතල පහසුකම් පද්ධතියක් සම්පූර්ණයෙන්ම විනාශ කිරීමට තමන් කටයුතු කළ බව ඊශ්‍රායල ආරක්ෂක හමුදාව ප්‍රකාශ කර තිබෙනවා.

එම භූගත පරිශ්‍රය තුළ රොකට්, මිසයිල, මිනිසුන් රහිත ගුවන් යානා (Drones), මැෂින් තුවක්කු, ටැංකි නාශක මිසයිල මෙන්ම බිම් බෝම්බ ඇතුළු විශාල පුපුරන ද්‍රව්‍ය තොගයක් ගබඩා කර තිබූ බවද ඊශ්‍රායල හමුදාව වැඩිදුරටත් සඳහන් කළා.