දේශීය තාක්ෂණයෙන් ලොව දිනන ශ්‍රී ලාංකීය විප්ලවය.. දකුණු ආසියාවේ ප්‍රථම ආරක්ෂක හියුමනොයිඩ් රොබෝව Spera එළිදක්වයි.|Hiru TV Blog

දේශීය තාක්ෂණයෙන් ලොව දිනන ශ්‍රී ලාංකීය විප්ලවය.. දකුණු ආසියාවේ ප්‍රථම ආරක්ෂක හියුමනොයිඩ් රොබෝව Spera එළිදක්වයි.

Wednesday, 09 September 2026 - 17:01 | Views - 38

ශ්‍රී ලාංකේය තාක්ෂණික ක්ෂේත්‍රයේ නව පිටුවක් පෙරළමින්, දකුණු ආසියාවේ ප්‍රථම ආරක්ෂක හියුමනොයිඩ් රොබෝව ලෙස සැලකෙන ‘Spera Humanoid – Prototype One’ එළිදැක්වීමට දේශීය තාක්ෂණික සමාගමක් වන Spera සමත්ව තිබෙනවා.

සමාගමේ නවවැනි සංවත්සරයට සමගාමීව හඳුන්වාදුන් මෙම පූර්ණ ප්‍රමාණයේ ද්විපාද රොබෝව (Full-scale Bipedal Robot) විශේෂයෙන්ම ආරක්ෂක කටයුතු සඳහා නිර්මාණය කර ඇති අතර, එය ජාත්‍යන්තර වෙළෙඳපොළ ඉලක්ක කරගත් සම්පූර්ණයෙන්ම ශ්‍රී ලාංකීය නිර්මාණයක් වීම විශේෂත්වයක්.

විදේශයන්හි නිෂ්පාදිත රොබෝ පද්ධති හෝ බාහිර තාක්ෂණයන් භාවිත කර මෙරට එකලස් කළ නිෂ්පාදනයක් වෙනුවට, මෙම රොබෝව මූලික සැලසුමේ සිටම ශ්‍රී ලාංකීය ඉංජිනේරු හැකියාවන් සහ දීර්ඝ පර්යේෂණ මත නිර්මාණය කර තිබීම අභිමානයට කරුණක්.

Spera හි නිර්මාතෘ සහ ප්‍රධාන විධායක නිලධාරී සහන් යාපා කුඩා කල සිටම යන්ත්‍ර නිර්මාණය කෙරෙහි උනන්දුවක් දැක්වූ අතර, මෘදුකාංග සංවර්ධනය, ඉලෙක්ට්‍රොනික විද්‍යාව, යාන්ත්‍ර විද්‍යාව සහ රොබෝ තාක්ෂණය පිළිබඳ දැනුම ස්වයං අධ්‍යයනයෙන් ලබාගත් දක්ෂ ව්‍යවසායකයෙක්.

වසර ගණනාවක් පුරා සිදුකළ අත්හදා බැලීම්, අසාර්ථකත්වයන් මෙන්ම මූල්‍ය අභියෝග රැසක් ජයගනිමින් ඔහු මෙම රොබෝව සංවර්ධනය කර තිබෙනවා.

බාහිර ආයෝජන මත පමණක් රඳා නොසිට, ජාත්‍යන්තර සේවාදායකයන් සඳහා Blockchain, Industry 4.0 සහ නව තාක්ෂණික විසඳුම් සපයන මෘදුකාංග ව්‍යාපාරයක් හරහා උපයාගත් ආදායම නැවතත් මෙම රොබෝ තාක්ෂණය වෙනුවෙන් ආයෝජනය කිරීමට ඔහු කටයුතු කර තිබෙනවා.

මෙම අතිනවීන මූලාකෘතිය ලොව ඉහළ අවදානම් සහිත ප්‍රදේශවල ආරක්ෂක කටයුතු සඳහා මේ වන විටත් ජාත්‍යන්තර අවධානය දිනාගැනීමට සමත්ව ඇති බව Spera සමාගම පවසනවා.

ඉදිරියේදී රටවල් කිහිපයක මෙය වාණිජ මට්ටමින් හඳුන්වාදීමට සැලසුම් කර ඇති අතර, දෙවැනි පරම්පරාවේ ‘Spera 2.0’ අනුවාදය ද සංවර්ධනය කිරීමට නියමිතව තිබෙනවා.

"අපි වාර ගණනාවක් අසාර්ථක වුණත් උත්සාහය අත්හැරියේ නැහැ. අද ශ්‍රී ලාංකීය තාක්ෂණික හැකියාව ලෝකයට පෙන්වීමට අපි සූදානම්," යනුවෙන් සහන් යාපා සතුටින් ප්‍රකාශ කළා.