දක්ෂිණ අධිවේගී මාර්ගයේ දොඩංගොඩදී හදිසි අනතුරක්.. මාර්ගයෙන් ඉවතට පැන ආරක්ෂිත වැට මත පතිත වූ මෝටර් රථය..|Hiru TV Blog

දක්ෂිණ අධිවේගී මාර්ගයේ දොඩංගොඩදී හදිසි අනතුරක්.. මාර්ගයෙන් ඉවතට පැන ආරක්ෂිත වැට මත පතිත වූ මෝටර් රථය..

Monday, 07 September 2026 - 13:21 | Views - 39

දක්ෂිණ අධිවේගී මාර්ගයේ දොඩංගොඩ ප්‍රදේශයේ 32.4 කිලෝමීටර් කණුව ආසන්නයේදී සුඛෝපභෝගී මෝටර් රථයක් මාර්ගයෙන් ඉවතට පැන මැද ආරක්ෂිත වැට මතට ගොස් නතර වීමෙන් අද (07) පෙරවරුවේ අනතුරක් සිදුව ඇති බව දක්ෂිණ අධිවේගී රථවාහන පොලිසිය ප්‍රකාශ කරනවා.

කටුනායක බණ්ඩාරනායක ජාත්‍යන්තර ගුවන් තොටුපොළේ සිට මාතර දෙසට අධික වේගයෙන් ධාවනය වෙමින් තිබූ මෙම මෝටර් රථය, එම අවස්ථාවේ නඩත්තු කටයුතු සඳහා වෝටර් බැරියර් යොදා ආවරණය කර තිබූ ස්ථානයක තිබූ මාර්ග බාධක ද අනතුරට ලක් කරමින් ඉදිරියට ඇදී ගොස් මෙලෙස ආරක්ෂිත වැට මත පතිත වී ඇති බව වාර්තා වුණා.

මෙම හදිසි අනතුරින් අධිවේගී මාර්ගයේ මැද සවිකර ඇති ආරක්ෂිත වැටට, යොදා තිබූ මාර්ග බාධකවලට මෙන්ම අනතුරට ලක්වූ සුඛෝපභෝගී මෝටර් රථයටද දැඩි ලෙස හානි සිදුව තිබෙනවා.

අනතුර සිදුවූ ස්ථානයට පැමිණි අධිවේගී රථවාහන ගැලනිගම පොලිස් ස්ථානයේ නිලධාරීන් විසින් සිද්ධිය සම්බන්ධයෙන් වැඩිදුර පරීක්ෂණ කටයුතු ආරම්භ කර ඇති අතර, අධිවේගී මාර්ගයේ ගමන් ගන්නා අනෙකුත් රියදුරන්ට ද අවධානයෙන් රීතිවලට අනුකූලව රීති පිළිපදිමින් රිය පදවන ලෙස පොලිසිය ඉල්ලා සිටිනවා.