සංගීතයෙන් හෙළ කලා කෙත අස්වැද්දූ තවත් තරුවක් නිවී යයි.. ප්‍රවීණ සංගීතඥ විමලජිත් දොඹගහවත්ත අභාවප්‍රාප්ත වෙයි.|Hiru TV Blog

සංගීතයෙන් හෙළ කලා කෙත අස්වැද්දූ තවත් තරුවක් නිවී යයි.. ප්‍රවීණ සංගීතඥ විමලජිත් දොඹගහවත්ත අභාවප්‍රාප්ත වෙයි.

Wednesday, 02 September 2026 - 14:37 | Views - 126

මෙරට සංගීත ක්ෂේත්‍රයේ ප්‍රවීණ සංගීතඥයෙකු, සංගීත අධ්‍යක්ෂවරයෙකු, ගායකයෙකු මෙන්ම දක්ෂ ගීත රචකයෙකු ද වන විමලජිත් දොඹගහවත්ත අභාවප්‍රාප්ත වී තිබෙනවා. අභාවප්‍රාප්ත වන විට ඔහු 69 වන වියෙහි පසුවුණා.

දශක ගණනාවක් පුරා ශ්‍රී ලාංකේය සංගීත කෙත පෝෂණය කිරීම සඳහා අසමසම මෙහෙවරක් ඉටුකළ විමලජිත් දොඹගහවත්තයන්, විශේෂයෙන්ම 70, 80 සහ 90 දශකයන්හි ප්‍රසාංගික වේදිකාව මෙන්ම කැසට් සහ ගුවන්විදුලි මාධ්‍ය ඔස්සේ ප්‍රේක්ෂකයන් අතර අතිශය ජනප්‍රියත්වයට පත් වූ ප්‍රමුඛ පෙළේ කලාකරුවෙක්.

ඔහු විසින් ගායනා කළ මෙන්ම සංගීතවත් කළ 'සීතල කැටි ගැසී', 'රොටිය කරවෙලා නෝනේ', 'රෑ සඳ පාන ගෙතුලට ගේන' වැනි රසබර ගීත නිර්මාණ අදටත් ශ්‍රී ලාංකේය රසික හදවත් අමන්දානන්දයට පත් කරන නොමැකෙන මතකයන් ලෙස පවතිනවා.

සරල ගීත මෙන්ම මනරම් තනු නිර්මාණයන් ඔස්සේ ස්වකීය අනන්‍යතාවය ගොඩනගාගත් ඔහු, නවක ගායක ගායිකාවන් රැසකට ද සංගීත ක්ෂේත්‍රය තුළ ඉදිරියට ඒමට මගපෙන්වූ දැවැන්ත සෙවනැල්ලක්.

ඔහුගේ මෙම හදිසි අභාවය සම්බන්ධයෙන් මෙරට සංගීත සංගමය, කලා ක්ෂේත්‍රයේ ප්‍රවීණයන් මෙන්ම සුවහසක් ආදරණීය රසික ජනතාව සිය අතිශය සංවේගය පළ කර සිටිනවා.