නාවල පොලිස් වෙඩිල්ල පිටුපස සරසවි සිසුවියකගේ පෙම් පලහිලව්වක්.. උපාධි ප්‍රදානෝත්සවයට ආ සිසුවිය පැහැරගත් පෙම්වතා සොයා මෙහෙයුම්..|Hiru TV Blog

නාවල පොලිස් වෙඩිල්ල පිටුපස සරසවි සිසුවියකගේ පෙම් පලහිලව්වක්.. උපාධි ප්‍රදානෝත්සවයට ආ සිසුවිය පැහැරගත් පෙම්වතා සොයා මෙහෙයුම්..

Sunday, 30 August 2026 - 15:09 | Views - 47

කොළඹ බණ්ඩාරනායක සම්මන්ත්‍රණ ශාලාවේ (BMICH) පැවැති රාජ්‍ය විශ්වවිද්‍යාලයක උපාධි ප්‍රදානෝත්සවයකට සහභාගී වී සිටි සරසවි සිසුවියක් පැහැරගෙන යාමට උත්සාහ කිරීම සහ ඊට අදාළව නාවලදී මෝටර් රථයකට පොලිසිය වෙඩි තැබීමේ සිද්ධිය පිටුපස පෙම් පලහිලව්වක් ඇති බවට වැඩිදුර තොරතුරු අනාවරණය වී තිබෙනවා.

මෙම පැහැරගැනීමට උත්සාහ කර ඇත්තේ අදාළ තරුණියගේ පෙම්වතා බවට විමර්ශනවලදී තහවුරු වී ඇති බව පොලිසිය සඳහන් කළා.

ඊයේ පස්වරු 1.30ට පමණ මෝටර් රථයකින් තරුණියක් පැහැරගෙන යන බවට නාරාහේන්පිට පොලිසියට හදිසි තොරතුරක් ලැබී ඇති අතර, ඒ අනුව ක්‍රියාත්මක වූ පොලිස් නිලධාරීන් නාරාහේන්පිට සිට නාවල දෙසට ධාවනය වූ මෝටර් රථයක් නවත්වීමට උත්සාහ කර තිබෙනවා.

එම අවස්ථාවේදී රථය පොලිස් අණ නොතකා ධාවනය කර ඇති අතර, නාරාහේන්පිට – නාවල මාර්ගයේදී යළිත් රථය නතර කිරීමට සංඥා කළද එය නොනවත්වා ධාවනය කිරීම නිසා පොලිසිය විසින් මෝටර් රථයට වෙඩි ප්‍රහාරයක් එල්ල කර තිබෙනවා.

වෙඩි තැබීමත් සමඟ රියදුරු මෝටර් රථය මඟ දමා පලාගොස් ඇති අතර, පොලිසිය සිදුකළ පරීක්ෂාවේදී රථය තුළ සිටි තරුණිය සොයාගෙන තිබෙනවා. ඇය BMICH හිදී පැහැරගැනීමට ලක්වූ තරුණිය බවට හඳුනාගෙන තිබෙනවා.

මෝටර් රථය ධාවනය කර ඇත්තේ ඇයගේ පෙම්වතා වන අතර, ඔවුන් දෙදෙනාම මාතර වැලිගම සහ මිදිගම ප්‍රදේශවල පදිංචිකරුවන් බව විමර්ශනවලදී අනාවරණ වී තිබෙනවා.

තරුණිය සිය පවුලේ ඥාතීන් සමඟ උපාධි ප්‍රදානෝත්සවයට පැමිණ ඇත්තේ පෙම්වතාට නොදන්වා වන අතර, ඇය පැහැරගෙන යන බවට පොලිසියට දැනුම් දී ඇත්තේ ඇගේ පියායි.

විශේෂත්වය වන්නේ පැහැරගැනීමට භාවිත කළ මෝටර් රථය පෙම්වතාගේ වන අතර, එය උපාධි ප්‍රදානෝත්සවය සඳහා රැගෙනවිත් ඇත්තේ තරුණියගේ පියා විසිනුයි.

දැනට අදාළ මෝටර් රථය කුරුඳුවත්ත පොලිසියට රැගෙන ගොස් ඇති අතර, තරුණිය අධිකරණ වෛද්‍ය නිලධාරිවරයා වෙත ඉදිරිපත් කර තිබෙනවා.

පලාගිය සැකකාර පෙම්වතා අත්අඩංගුවට ගැනීම සඳහා පොලිසිය මඟින් විශේෂ මෙහෙයුම් ක්‍රියාත්මක කෙරෙනවා.