නාවල මාර්ග බාධකයේදී පොලිසියෙන් වෙඩි තැබීමක්.. පොලිස් අණ නොතකා ධාවනය කළ රථයකින් තරුණියක් මුදා ගනී.|Hiru TV Blog

නාවල මාර්ග බාධකයේදී පොලිසියෙන් වෙඩි තැබීමක්.. පොලිස් අණ නොතකා ධාවනය කළ රථයකින් තරුණියක් මුදා ගනී.

Sunday, 30 August 2026 - 14:30 | Views - 37

නාවල ප්‍රදේශයේ පිහිටුවා තිබූ පොලිස් මාර්ග බාධකයකදී අණ නොතකා ධාවනය කරන ලද සැකකටයුතු මෝටර් රථයකට පොලිසිය විසින් වෙඩි තැබීමේ සිද්ධියක් වාර්තා වනවා.

මෙම සිදුවීමට මුල් වී ඇත්තේ තරුණියක් බලහත්කාරයෙන් පැහැරගෙන යන බවට පොලිසියට ලැබුණු හදිසි තොරතුරක්.

ඒ අනුව, අදාළ ප්‍රදේශයේ ආරක්ෂාව තර කරමින් නාවල මාර්ග බාධකයේදී අදාළ මෝටර් රථය නතර කිරීමට පොලිස් නිලධාරීන් සංඥා කර තිබෙනවා.

කෙසේ වෙතත්, රියදුරු පොලිස් අණ පයිසෙකටවත් මායිම් නොකර අධික වේගයෙන් රථය ඉදිරියට ධාවනය කිරීමට කටයුතු කර තිබෙනවා.

එහිදී තත්ත්වය පාලනය කිරීම සහ රථය නැවැත්වීම සඳහා පොලිසිය විසින් එම මෝටර් රථයට වෙඩි තැබීම සිදු කර තිබෙනවා.

පොලිස් වෙඩි තැබීමත් සමඟ කලබලයට පත් වූ රියදුරු, මෝටර් රථය සහ එහි සිටි තරුණිය මඟ දමා ප්‍රදේශයෙන් පලාගොස් ඇති බව වාර්තා වුණා.

සිදුවූ මෙම වෙඩි තැබීමෙන් කිසිදු පුද්ගලයෙකුට තුවාල සිදුවී නොමැති බව පොලිසිය තහවුරු කළා.

මෝටර් රථයේ සිටි තරුණිය පොලිස් භාරයට ගෙන ඇති අතර, සිද්ධියෙන් පසු ප්‍රදේශයෙන් පලාගිය සැකකාර රියදුරු අත්අඩංගුවට ගැනීම සඳහා පොලිසිය විසින් විශේෂ විමර්ශන ආරම්භ කර තිබෙනවා.