ඓතිහාසික දළදා පූජෝපහාරයේ නිමාව.. මහවැලි ගඟේ ගැටඹේ තොටින් ඇරඹුණු දිය කැපීමේ චාරිත්‍රය..|Hiru TV Blog

ඓතිහාසික දළදා පූජෝපහාරයේ නිමාව.. මහවැලි ගඟේ ගැටඹේ තොටින් ඇරඹුණු දිය කැපීමේ චාරිත්‍රය..

Friday, 28 August 2026 - 8:28 | Views - 116

මහනුවර ඓතිහාසික ඇසළ පෙරහරේ අවසාන පූජනීය චාරිත්‍රයක් වන දිය කැපීමේ චාරිත්‍රය අද (28) උදෑසන මහවැලි ගඟේ ගැට‍ඹේ තොටේදී අතිඋත්කර්ෂවත් ලෙස සිදු කෙරෙමින් පවතිනවා.

මෙම පුණ්‍ය භූමියේදී දිය කැපීමේ චාරිත්‍රය නිමවීමෙන් අනතුරුව, අද පැවැත්වෙන දහවල් පෙරහරින් පසු මෙවර ඇසළ පෙරහර නිල වශයෙන් නිමාවට පත්වීමට නියමිතයි.

ඊයේ (27) රාත්‍රියේ වීථි සංචාරය කරන ලද අභිමානවත් අවසන් රන්දෝලි පෙරහරේ සධාතුක කරඬුව වැඩම කරවීමේ මහා පින්කම සිදු කරනු ලැබුවේ කතරගම වාසනා හස්ති රාජයා විසිනුයි.

මෙම ඓතිහාසික අවසන් රන්දෝලි පෙරහර නැරඹීම සඳහා ජනාධිපති අනුර කුමාර දිසානායකද එක්වූ අතර, ඊට ප්‍රථම ජනාධිපතිවරයා ශ්‍රී දළදා සමිඳුන් වැඳපුදා ගනිමින් මල්වතු සහ අස්ගිරි මහා නා හිමිවරුන් බැහැදැක උතුම් ආශිර්වාද ලබා ගැනීමටද කටයුතු කළා.

පෙරහර කටයුතු සාර්ථකව නිම කළ බව සනිටුහන් කෙරෙන සන්නස් පත්‍රය, දියවඩන නිලමේවරයා ප්‍රමුඛ සතර මහා දේවාලවල බස්නායක නිලමේවරුන් විසින් නිල සංදේශයකින් ජනාධිපතිවරයා වෙත භාරදීමට නියමිතයි.

එම විශේෂ රාජ්‍ය උත්සවය අද (28) පස්වරුවේ මහනුවර ජනාධිපති මන්දිරයේදී අතිඋත්කර්ෂවත් ලෙස පැවැත්වීමට සියලු කටයුතු යොදා තිබෙනවා.