සමාජ මාධ්‍ය හරහා ක්‍රියාත්මක වූ මහා ජාවාරමක් හෙළිවෙයි.. කාන්තාවන් සහ සිසුන්ගේ පුද්ගලික ඡායාරූප අලෙවි කළ පිරිසක් ගැන පරීක්ෂණ..|Hiru TV Blog

සමාජ මාධ්‍ය හරහා ක්‍රියාත්මක වූ මහා ජාවාරමක් හෙළිවෙයි.. කාන්තාවන් සහ සිසුන්ගේ පුද්ගලික ඡායාරූප අලෙවි කළ පිරිසක් ගැන පරීක්ෂණ..

Thursday, 27 August 2026 - 9:46 | Views - 71

සමාජ මාධ්‍ය ජාල හරහා සිසුන්ගේ සහ කාන්තාවන්ගේ පුද්ගලික ඡායාරූප මෙන්ම ඇතැම් වීඩියෝ දර්ශන මිල දී ගැනීම සහ අලෙවි කිරීමේ නීති විරෝධී මාර්ගගත (Online) ජාවාරමක් පිළිබඳ තොරතුරු වාර්තා වී ඇති බව කාන්තා හා ළමා කටයුතු අමාත්‍යාංශය පවසනවා.

මෙම සිදුවීමට අදාළව දැනට අනාවරණය කරගත් සියලු කරුණු සහ තොරතුරු ඉදිරි විමර්ශන කටයුතු සඳහා පොලිස් ළමා හා කාන්තා කාර්යාංශය මෙන්ම පරිගණක අපරාධ විමර්ශන කොට්ඨාසය (CCID) වෙත යොමු කිරීමට පියවර ගෙන ඇති බව එම අමාත්‍යාංශය සඳහන් කර සිටිනවා.

මෙම අනිසි ක්‍රියාවන් සඳහා යොදාගන්නා ඇතැම් සමාජ මාධ්‍යජාලා සමූහ බොහොමයක් විදේශ රටවල සිට මෙහෙයවනු ලබන ඒවා බව විමර්ශනවලදී වැඩිදුරටත් හඳුනාගෙන තිබෙනවා.

යම් හෙයකින් කිසිවෙකු හෝ මෙවැනි ජාවාරමක ගොදුරක් වී ඇති බවට නිරීක්ෂණය වුවහොත්, ඔවුන් වෙනුවෙන් අවශ්‍ය මනෝ සමාජයීය උපදේශනයන් ලබාදීමට සහ අනෙකුත් නෛතික සහයන් සපයා ගැනීමට කටයුතු සූදානම් කර තිබෙනවා.

ඒ සඳහා 1938 සහ 1929 යන ගාස්තු රහිත උපකාරක සේවා දුරකථන අංක අමතන ලෙස කාන්තා හා ළමා කටයුතු අමාත්‍යාංශය ජනතාවගෙන් ඉල්ලා සිටිනවා.