මත්පැන් වෙනුවට ඖෂධ සොයන Gen Z යොවුන් පරපුර.. වෛද්‍ය අධීක්ෂණයෙන් තොර ඖෂධ භාවිතයේ භයානක අවදානම මෙන්න.|Hiru TV Blog

මත්පැන් වෙනුවට ඖෂධ සොයන Gen Z යොවුන් පරපුර.. වෛද්‍ය අධීක්ෂණයෙන් තොර ඖෂධ භාවිතයේ භයානක අවදානම මෙන්න.

Wednesday, 26 August 2026 - 17:30 | Views - 41

වර්තමාන Gen Z පරම්පරාව එනම් 1997 සහ 2012 අතර කාලසීමාවේ උපන් යොවුන් පිරිස අතර පවතින කාංසා (Anxiety) සහ මානසික ආතති තත්ත්වයන් පෙර කිසිදු පරම්පරාවකට වඩා ඉහළ මට්ටමක පවතින බව පර්යේෂණවලින් තහවුරු වී තිබෙනවා.

1990 සිට 2021 දක්වා කාලය තුළ වයස අවුරුදු 10ත් 24ත් අතර තරුණ පිරිස් අතර කාංසා තත්ත්වයන් පිළිබඳ වාර්තා වීම් මිලියන 10 සිට මිලියන 16 දක්වා ඉහළ ගොස් ඇති අතර, මේ නිසාම ඔවුන් සමාජගත වීමේදී මුහුණ දෙන මානසික බිය මඟහරවා ගැනීමට නොයෙකුත් ක්‍රමවේද සොයමින් සිටිනවා.

මෙහි ඇති භයානකම තත්ත්වය වන්නේ මත්පැන් පානය කිරීමෙන් පසුදින ඇතිවන ශාරීරික අපහසුතා එනම් "හැන්ගෝවර්" තත්ත්වයන් නැති කිරීම සහ අක්මාවට වන හානිය වැනි සෞඛ්‍ය ගැටලුවලින් මිදීම සඳහා, ඔවුන් මත්පැන් වෙනුවට වෛද්‍ය වට්ටෝරුවලට ලබාදෙන ඖෂධ අනිසි ලෙස භාවිත කිරීමට පෙළඹීමයි.

විශේෂයෙන්ම අපස්මාරය සහ කාංසාවට ලබාදෙන ප්‍රිගැබලින් (Pregabalin) සහ හෘද රෝග සඳහා ලබාදෙන Beta blocker වැනි ඖෂධ වර්ග සමාජ මාධ්‍ය හරහා නීතිවිරෝධී ලෙස මිලදී ගෙන භාවිත කිරීමට බොහෝ තරුණ පිරිස් යොමු වී සිටිනවා.

මෙම ඖෂධ අධිමාත්‍රාවලින් ලබාගත් විට මත්පැන් පානය කළා හා සමාන ප්‍රීතිමත් සහ සැහැල්ලු හැඟීමක් ලැබෙන බැවින්, මෙය මත්පැන්වලට වඩා "පිරිසිදු සහ ආරක්ෂිත" විකල්පයක් ලෙස සැලකීමට තරුණ පිරිස පෙළඹී සිටිනවා.

මෙය අතිශය ව්‍යාජ ආරක්ෂිත හැඟීමක් පමණක් වන බව නමුත් විශේෂඥයින් පෙන්වා දෙනවා.

වෛද්‍ය උපදෙස් රහිතව මෙම ඖෂධ දිගින් දිගටම භාවිත කිරීමෙන් කෙටි කාලයකින් ඊට ශරීරය හුරු වන අතර, පසුව සාමාන්‍ය සමාජීය අවස්ථාවකට හෝ නිවසින් එළියට බැසීමට පවා මෙම ඖෂධ නොමැතිව බැරි තත්ත්වයට පුද්ගලයා ඇබ්බැහි වීමක් සිදුවෙනවා.

එපමණක් නොව, මෙම ඖෂධ අධිමාත්‍රාවලින් ශරීරගත වීම නිසා හෘද ස්පන්දනය භයානක ලෙස අඩුවීම, සිහිමූර්ජා වීම සහ ශ්වසන පද්ධතිය අඩාල වී ජීවිතයට පවා තර්ජනයක් එල්ල විය හැකියි.

ඖෂධ භාවිතය නැවැත්වීමට උත්සාහ කරන විට දැඩි මානසික අවපීඩනය, නින්ද නොයාම සහ සියදිවි නසාගැනීමේ සිතුවිලි පවා මතුවන බව වාර්තා වනවා.

එමෙන්ම අන්තර්ජාලය ඔස්සේ මිලදී ගන්නා ඖෂධවල ප්‍රමිතිය සහ සංයුතිය නිශ්චිත නොවන බැවින්, කළු කඩයෙන් ලබාගන්නා මෙවැනි ඖෂධ මඟින් අනපේක්ෂිත ලෙස ජීවිත අහිමි වීමේ අවදානමද අතිශයින්ම ඉහළයි.

එබැවින් සෞඛ්‍ය සම්පන්න විකල්පයක් ලෙස සිතා ඖෂධ මඟින් කාංසාව වසා ගැනීමට උත්සාහ කිරීම තවත් දැවැන්ත ඛේදවාචකයක ආරම්භය වන බවත්, රසායනික ද්‍රව්‍ය මත යැපෙමින් සමාජගත වීමට උත්සාහ කිරීම වෙනුවට සුදුසු වෛද්‍ය හෝ මානසික උපදේශන සේවා වෙත යොමුවීම අත්‍යවශ්‍ය බවත් විශේෂඥයෝ දැඩි ලෙස අවධාරණය කරනවා.