බන්ධනාගාර නොසන්සුන්තා ගැන සෙවීමට තද තීරණයක්.. සියලු ආයතන ප්‍රධානීන් මානව හිමිකම් කොමිසමට..|Hiru TV Blog

බන්ධනාගාර නොසන්සුන්තා ගැන සෙවීමට තද තීරණයක්.. සියලු ආයතන ප්‍රධානීන් මානව හිමිකම් කොමිසමට..

Monday, 10 August 2026 - 10:38 | Views - 34

දිවයින පුරා බන්ධනාගාර ආශ්‍රිතව වාර්තා වූ නොසන්සුන්කාරී තත්ත්වයන් සහ ගැටුම් පිළිබඳව දීර්ඝ ලෙස සාකච්ඡා කිරීම සඳහා ඊට අදාළ සියලු ආයතන ප්‍රධානීන් ශ්‍රී ලංකා මානව හිමිකම් කොමිෂන් සභාව වෙත කැඳවීමට තීරණය කර තිබෙනවා.

ඒ අනුව බන්ධනාගාර දෙපාර්තමේන්තු ප්‍රධානීන්, පොලිස්පතිවරයා සහ අදාළ අමාත්‍යාංශවල ලේකම්වරුන් එළඹෙන අගෝස්තු 18 වැනිදා මානව හිමිකම් කොමිෂන් සභාව හමුවට කැඳවා ඇති බවයි එම කොමිෂන් සභාවේ කොමසාරිස් නීතිඥ නිමල් ජී. පුංචිහේවා සඳහන් කළා.

මෙවැනි දරුණු සිදුවීම් ඉදිරියට යළි ඇති නොවීමට ගතයුතු ක්ෂණික ක්‍රියාමාර්ග ගැන සාකච්ඡා කිරීම මෙහි ප්‍රධාන අරමුණයි.

මීගමුව, මහර, මැගසින් සහ කුරුවිට යන බන්ධනාගාර තුළ ගෙවුණු සති පහක කාලය ඇතුළත හටගත් නොසන්සුන්කාරී තත්ත්වයන් හේතුවෙන් බන්ධනාගාර නිලධාරීන් සහ රැඳවියන් 36 දෙනෙකු ජීවිතක්ෂයට පත්ව තවත් 160කට අධික පිරිසක් තුවාල ලබා තිබෙනවා.

මේ අතර කුරුවිට, පල්ලන්සේන හා නව මැගසින් බන්ධනාගාරවල ගැටුම් ඇති කරගත් රැඳවියන් සම්බන්ධයෙන් සිදුකරන ලද විමර්ශන වාර්තාව හෙට දින ලැබීමට නියමිත බව ද පොලිසිය සඳහන් කර සිටිනවා.

මෙවැනි හදිසි තත්ත්වයක් හමුවේ, බන්ධනාගාර දෙපාර්තමේන්තුවේ තොරතුරු නිල වශයෙන් මාධ්‍ය වෙත ලබාදීම සඳහා නව මාධ්‍ය ප්‍රකාශකවරයෙකු පත් කිරීමට ද පියවර ගෙන තිබෙනවා.

ඒ අනුව බන්ධනාගාර කොමසාරිස් සේනක පල්ලෙතැන්න මෙලෙස නව මාධ්‍ය ප්‍රකාශකවරයා ලෙස පත් කර ඇති අතර, ඒ. සී. ගජනායක විසින් මීට පෙර එම තනතුරේ කටයුතු කරනු ලැබුවා.