අ.පො.ස උසස් පෙළ විභාගය හෙට ඇරඹෙයි.. විභාග ශාලාවට යන්න කලින් මේ දේවල් මතක තියාගන්න..|Hiru TV Blog

අ.පො.ස උසස් පෙළ විභාගය හෙට ඇරඹෙයි.. විභාග ශාලාවට යන්න කලින් මේ දේවල් මතක තියාගන්න..

Sunday, 09 August 2026 - 14:11 | Views - 32

මෙවර අ.පො.ස. උසස් පෙළ විභාගය හෙට (10) දිනයේ සිට ආරම්භ වීමට නියමිතව තිබෙනවා.

ලබන සැප්තැම්බර් 05 වැනිදා තෙක් දිවයින පුරා පිහිටි විභාග මධ්‍යස්ථාන 2,532කදී විභාග කටයුතු පැවැත්වීමට සියල්ල සැලසුම් කර තිබෙනවා.

විභාගය පැවැත්වෙන කාලය තුළ කිසියම් ආපදා තත්ත්වයක් මතු වුවහොත් ඒ සඳහා මුහුණ දීමට අවශ්‍ය මාර්ගෝපදේශ මාලාවක් ද කාලගුණ විද්‍යා දෙපාර්තමේන්තුව සහ විභාග දෙපාර්තමේන්තුව එක්ව සකස් කර ඇති බව ආපදා කළමනාකරණ මධ්‍යස්ථානය සඳහන් කළා.

මේ සම්බන්ධයෙන් අදහස් දැක්වූ විභාග කොමසාරිස් ජනරාල ඉන්දිකා කුමාරි ලියනගේ,

'' සියළුම විභාග අපේක්ෂකයින්ට මතක් කරනවා මේ වන විට ඔවුන්ගේ ප්‍රවේශපත්‍ර පාසල් අයැදුම්කරුවෙක්නම් විදුහල්පතිවරුන් වෙතටත් පෞද්ගලික අයැදුම්කරුවෙක්නම් නියමිත ලිපිනවලටත් තැපැල් මගින් යවා තිබෙනවා. මේ දරුවන් හොඳින් මතක තබාගත යුතුයි විභාග ප්‍රවේශපත්‍රයේ ඔවුන්ගේ අත්සන සහතික කරවාගෙන යා යුතුයි. ජාතික හැඳුනුම්පත වලංගු රියැදුරු බලපත්‍රය හෝ වලංගු විදෙස් ගමන් බලපත්‍රය යන ඒවායෙන් එකක් වලංගු අනන්‍යාතාපත්‍රයක් වෙනවා. එය දිනපතාම විභාග ශාලාවට රැගෙන යා යුතුයි. මෙම අනන්‍යාතාපත්‍රයක් අස්තානගතව ඇත්නම් තාවකාලික බලපත්‍රයක් ලෙස තැපැල් හැඳුනුම්පතට භාවිත කරන ප්‍රමාණයේ ඡායාරූප දෙකක් රැගෙන පාසලේ විදුහල්පති ලවා සහතික කරගෙන යා යුතුයි.
යම් හෙයකින් ප්‍රවේශපත්‍රය හානි වුවහොත් හෝ අස්ථානගත වුවහොත් විභාග දෙපාර්තමේන්තුවේ වෙබ් අඩවියෙන් ප්‍රවේශපත්‍රය භාගත කළ හැකියි. එයත් පෙර කී පරිදි සහතික කරවා ගත යුතුයි."