දෙහිවල සුසාන භූමියේ වෙඩික්කරු අනුරපුරෙන් කොටුවෙයි.. දෙහිවල වෙඩි තැබීමේ සිද්ධියේ ඇත්ත හෙළිවෙයි.|Hiru TV Blog

දෙහිවල සුසාන භූමියේ වෙඩික්කරු අනුරපුරෙන් කොටුවෙයි.. දෙහිවල වෙඩි තැබීමේ සිද්ධියේ ඇත්ත හෙළිවෙයි.

Monday, 03 August 2026 - 12:35 | Views - 33

දෙහිවල සුසාන භූමියේ මුරකරුට වෙඩි තැබීමේ සිද්ධියට සම්බන්ධ වෙඩික්කරු මිහින්තලය අඹතලාගම ප්‍රදේශයේ සැඟව සිටියදී පොලිසිය මගින් අත්අඩංගුවට ගෙන තිබෙනවා.

කළුබෝවිල අවිශ්ක හා කොස්මල්ලී යන අය විසින් මෙම වෙඩි තැබීම මෙහෙයවා ඇති අතර, ඒ සඳහා වෙඩික්කරුට රුපියල් ලක්ෂ දෙකක මුදලක් ද ලබා දී ඇති බව වෙඩික්කරුගෙන් කළ ප්‍රශ්න කිරීම්වලදී අනාවරණය වී තිබෙනවා.

නාඳුනන වෙඩික්කරුවන් දෙදෙනෙකු දෙහිවල සුසාන භූමියේ මුරකරුට වෙඩි තබා පළාගොස් තිබුණේ පසුගිය 19 වැනිදායි.

වෙඩි තැබීමෙන් අනතුරුව වෙඩික්කරුවන් පලායන ආකාරය ද CCTV කැමරාවක සටහන්ව තිබුණා.

වෙඩි වැදීමට ලක්ව තිබුණේ මත්ද්‍රව්‍ය ජාවාරම්කරුවෙකු බව කියන සැන්ඩෝ නමැත්තාගේ පියාටයි.

මේ සම්බන්ධයෙන් බස්නාහිර පළාත දකුණු දිසා අපරාධ විමර්ශන කොට්ඨාසය විමර්ශන ආරම්භ කර තිබුණා.

ඒ අනුව පසුගියදා මෙම වෙඩි තැබීම සඳහා වෙඩික්කරුවන් පැමිණි යතුරුපැදියේ පැදිකරුව අත්අඩංගුවට ගැනීමට විමර්ශන නිලධාරීන්ට හැකිවුණා. වෙඩික්කරු මිහින්තලය ප්‍රදේශයේ නිවසක සැඟව සිටින බව ඔහුගෙන් කළ ප්‍රශ්න කිරීම්වලදී අනාවරණ වී තිබෙනවා.

ඒ අනුව විමර්ශන නිලධාරීන් කළ මෙහෙයුමකදී වෙඩික්කරු සහ කාන්තාවක් මිහින්තලේ අඹතලාගම ප්‍රදේශයේදී අත්අඩංගුවට ගෙන තිබෙනවා.

වෙඩික්කරු 44 හැවිරිදි හිටපු හමුදා සෙබළෙකු වන අතර, ඔහු සමග අත්අඩංගුවට පත්වූ 35 හැවිරිදි කාන්තාව ඔහුගේ අනියම් බිරිඳ බවයි පොලිසිය පැවසුවා.

ඔවුන් සන්තකයේ තිබී ගිනි අවිය සඟවාගෙන ආ අත් බෑගය හා ජංගම දුරකථන දෙකක් ද පොලිසිය භාරයට ගෙන තිබෙනවා.

ඔහු තවත් පුද්ගලයෙකු සමග පසුගිය 19 වැනිදා පෙරවරුවේ සොහොන් කොතකට පහන් දැල්වීමේ මුවාවෙන් දෙහිවල සුසාන භූමියට පැමිණ ඇති බව වෙඩික්කරුගෙන් කළ ප්‍රශ්න කිරීම්වලදී අනාවරණය වුණා.

කෙසේවෙතත් ඔවුන්ගේ ඉලක්කය වූ මුරකරු එහි නොසිටීම හේතුවෙන් ඔවුන් නැවතත් එදින සවස් කාලයේ පැමිණ වෙඩි තැබීම සිදුකර ඇති බව ද මෙහිදී හෙළිව තිබෙනවා.

මෙම වෙඩි තැබීම සංවිධානාත්මක අපරාධකරුවන් හා මහා පරිමාණ මත්ද්‍රව්‍ය ජාවාරම්කරුවන් වන අවිෂ්ක ඒෂාන් නොහොත් "කළුබෝවිල අවිශ්ක" හා "කොස් මල්ලී" යන අය විසින් මෙහෙයවා ඇති බව විමර්ශන නිලධාරීන් අනාවරණ කරගෙන තිබෙනවා.

ඒ වෙනුවෙන් රුපියල් ලක්ෂ දෙකක මුදලක් තමන්ට ලබාදුන් බවටත් වෙඩික්කරු හෙළි කළ බව පොලිසිය පවසනවා.