පේරාදෙණිය සරසවියට දිවියෙකුගේ බියක්.. උපකුලපතිවරයාගෙන් සිසුන්ට සහ කාර්ය මණ්ඩලයට විශේෂ දැනුම්දීමක්..|Hiru TV Blog

පේරාදෙණිය සරසවියට දිවියෙකුගේ බියක්.. උපකුලපතිවරයාගෙන් සිසුන්ට සහ කාර්ය මණ්ඩලයට විශේෂ දැනුම්දීමක්..

Friday, 31 July 2026 - 9:15 | Views - 34

පේරාදෙණිය විශ්වවිද්‍යාල පරීශ්‍රය තුළ සැරිසරන දිවියෙකු හේතුවෙන් දැඩි විමසිල්ලෙන් පසුවන ලෙස එම විශ්වවිද්‍යාලයේ උපකුලපති මහාචාර්ය ටෙරන්ස් මදුජිත් සිසු සිසුවියන්ගෙන් සහ කාර්ය මණ්ඩල සාමාජිකයින්ගෙන් ඉල්ලා සිටිනවා.

සරසවි සමාජයේ ආරක්ෂාව තහවුරු කිරීම වෙනුවෙන් විශේෂ නිවේදනයක් නිකුත් කරමින් ඔහු මෙම දැනුම්දීම සිදුකර තිබෙනවා.

පසුගිය ජනවාරි මාසයේදී උඩ පේරාදෙණිය රක්ෂිත ප්‍රදේශයේ සිට පැමිණි මෙම දිවියා, විශ්වවිද්‍යාලයේ පශු වෛද්‍ය පීඨයට අයත් සත්ව ගොවිපොළේ සිටි මී ගව පැටවෙකු මරා දැමීමට කටයුතු කර තිබූ බව වාර්තා වුණා.

එම සිදුවීමත් සමඟ විශ්වවිද්‍යාල පරිශ්‍රය තුළ ආරක්ෂිත පියවරයන් ඉහළ නැංවීමට පාලනාධිකාරිය කටයුතු කළා.

මේ පිළිබඳව කළ විමසීමකදී, සිසුන්ගේ සහ කාර්ය මණ්ඩලයේ සුභසාධනය හා ආරක්ෂාව උදෙසා මෙම පූර්ව අනතුරු ඇඟවීම සිදුකළ බව උපකුලපති මහාචාර්ය ටෙරන්ස් මදුජිත් ප්‍රකාශ කළා.

එමෙන්ම මෙම හදිසි තත්ත්වය සම්බන්ධයෙන් වනජීවී සංරක්ෂණය පිළිබඳ දෙපාර්තමේන්තුව දැනුවත් කිරීමට පියවර ගෙන ඇති අතර පශු වෛද්‍ය පීඨයේ සත්ව ගොවිපොළ පරිශ්‍රය වෙනුවෙන් අමතර ආරක්ෂිත වැටක් සවිකිරීමට කටයුතු කළ බවද උපකුලපතිවරයා වැඩිදුරටත් සඳහන් කළා.