සම්බුද්ධ ශාසනයේ අනාගතය වෙනුවෙන් තීරණාත්මක පියවරක්.. මහ සඟ සමුළුව අද කොළඹදී..|Hiru TV Blog

සම්බුද්ධ ශාසනයේ අනාගතය වෙනුවෙන් තීරණාත්මක පියවරක්.. මහ සඟ සමුළුව අද කොළඹදී..

Monday, 27 July 2026 - 8:54 | Views - 48

ශාසනාරක්ෂක සංඝ සභාව විසින් අද (27) මහා සංඝ සමුළුවක් කැදවා තිබෙනවා. කොළඹ ශ්‍රී ලංකා ප්‍රදර්ශන හා සම්මේලන මධ්‍යස්ථානයේදී අද පස්වරු 2.30ට මෙම ඓතිහාසික සංඝ සමුළුව ආරම්භ කිරීමට නියමිතයි.

වත්මන් ශාසනික සහ සමාජයීය තත්ත්වයන් පිළිබඳව අවධානය යොමු කරමින්, ශාසනයේ අනාගත උන්නතිය වෙනුවෙන් සාකච්ඡා කිරීමේ අරමුණින් සංඝ සභාව මෙම සමුළුව කැඳවා තිබෙනවා.

ශාසනාරක්ෂක සංඝ සභාව වෙනුවෙන් ජ්‍යෙෂ්ඨ මහාචාර්ය පූජ්‍ය අගලකඩ සිරිසුමන හිමියන්, ජ්‍යෙෂ්ඨ මහාචාර්ය පූජ්‍ය ඉඳුරාගාරේ ධම්මරතන හිමියන් සහ ජ්‍යෙෂ්ඨ මහාචාර්ය පූජ්‍ය මැදගොඩ අභයතිස්ස හිමියන් ඇතුළු පූජනීය භික්ෂූන් වහන්සේලා රැසකගේ ප්‍රධානත්වයෙන් සහ සංවිධානයෙන් මෙම මහා හමුව සංවිධානය කර තිබෙනවා.

මෙම සුවිශේෂී මහා සංඝ සමුළුව සඳහා උතුර, නැගෙනහිර, දකුණ ඇතුළු දිවයිනේ සියලුම පළාත් සහ දිස්ත්‍රික්ක නියෝජනය කරමින් නිකායත්‍රයේම මහා සංඝරත්නය විශාල වශයෙන් වැඩම කිරීමට නියමිතයි. ශාසනාරක්ෂක බලමණ්ඩලවල නිලධාරී හිමිවරුන්, විහාරාධිපති හිමිවරුන් මෙන්ම පිරිවෙන් ආචාර්යයන් වහන්සේලා ද ඇතුළුව දහස් සංඛ්‍යාත මහ සංඝරත්නයකගේ සහභාගීත්වයෙන් මෙම සමුළුව පැවැත්වීමට කටයුතු සංවිධානය කර තිබෙනවා.

එමෙන්ම අද පස්වරුවේ පැවැත්වෙන මෙම මහා සංඝ සමුළුවේදී ශාසනික අයිතිවාසිකම් රැකගැනීම, සම්බුද්ධ ශාසනයේ චිරස්ථිතිය උදෙසා ගත යුතු ඉදිරි පියවර මෙන්ම වත්මන් ශාසනික අභියෝගයන්ට මුහුණ දෙන ආකාරය පිළිබඳව දීර්ඝ වශයෙන් සාකච්ඡා කිරීමට නියමිතයි.

මෙවැනි තීරණාත්මක කාලවකවානුවක දිවයින පුරා වැඩවෙසෙන මහ සඟරුවන මෙලෙස එකම අරමුණක් වෙනුවෙන් කොළඹට රැස්වීම ශාසනික ඉතිහාසයේ සුවිශේෂී සංසිද්ධියක් වෙනවා.

Share This Article