අමෙරිකාවේ ඉස්ලාමීය පල්ලියකදී සිදුකළ ප්‍රහාරය.. තිදෙනෙකුට දිවි අහිමි වෙයි.|Hiru TV Blog

අමෙරිකාවේ ඉස්ලාමීය පල්ලියකදී සිදුකළ ප්‍රහාරය.. තිදෙනෙකුට දිවි අහිමි වෙයි.

Tuesday, 19 May 2026 - 12:11 | Views - 61

අමෙරිකාවේ කැලිෆෝනියා ප්‍රාන්තයේ සැන් ඩියාගෝ හි පිහිටි මුස්ලිම් පල්ලියක සිදුවූ වෙඩි තැබීමකින් පුද්ගලයන් තිදෙනෙකු ජීවිතක්ෂයට පත්වෙලා තිබෙනවා.

මේ වෙඩි තැබීම නව යොවුන් වියේ පසුවන වෙඩික්කරුවන් දෙදෙනෙකු විසින් සිදු කරන ලද්දක් බව බලධාරීන් විශ්වාස කර තිබෙනවා.

සැන් ඩියාගෝ හි ඉස්ලාමීය මධ්‍යස්ථානයේ (Islamic Center of San Diego) වෙඩි තැබීමක් සිදුවන බවට පොලිසියට ඇමතුමක් ලැබී ඇති අතර, එහිදී ගොඩනැගිල්ල ඉදිරිපිට වෙඩි වැදී සිටි වින්දිතයන් තිදෙනෙකු සොයා ගැනීමට ඔවුන්ට හැකිව තිබෙනවා.

ඉන් සුළු වේලාවකට පසු, අසල සිටි භූමි අලංකරණ ශිල්පියෙකුට (landscaper) වාහනයක සිට වෙඩි තබා ඇති බවට තවත් ඇමතුමක් පොලිසියට ලැබි ඇති බව විදෙස් මාධ්‍ය සඳහන් කළා.

නිලධාරීන් එම දෙවන ස්ථානයට පැමිණෙන විට, වයස අවුරුදු 17 සහ 18 පසුවන සැකකරුවන් දෙදෙනාම තමන්ටම වෙඩි තබාගෙන මියගොස් සිටියදී සොයාගෙන තිබෙනවා.

මියගිය අය අතර එම මධ්‍යස්ථානයේ සේවය කළ ආරක්ෂක නිලධාරියෙකු ද වන අතර, ඔහු තවත් බොහෝ පිරිසකගේ ජීවිත බේරා ගැනීමට කටයුතු කර ඇති බව බලධාරීන් පැවසූ නමුත්, ඒ පිළිබඳ වැඩිදුර විස්තර ලබා දී නොමැති බව විදෙස් මාධ්‍ය වාර්තා කළා.

එක් සැකකරුවෙකුගේ මව විසින් සොයා ගන්නා ලද ලේඛන හේතුවෙන්, ෆෙඩරල් විමර්ශන කාර්යාංශය (FBI) විසින් මෙම සිදුවීම වෛරී අපරාධයක් (hate crime) ලෙස විමර්ශනය කරනු ලබනවා.

එරට වේලාවෙන් පෙ.ව. 11:43ට පොලිසිය ප්‍රථමයෙන් එම මධ්‍යස්ථානය වෙත කැඳවූ බවත්, එහි ඉදිරිපිට මියගොස් සිටි බවට පෙනෙන වින්දිතයන් තිදෙනෙකු නිරීක්ෂණය කළ බව මාධ්‍ය හමුවකදී සැන් ඩියාගෝ පොලිස් ප්‍රධානී ස්කොට් වෝල් පැවසුවා.

තම පුතා නිවසින් පිටව යන විට ඇයගේ ගිනි අවි කිහිපයක් හා ඇයගේ මෝටර් රථය රැගෙන ගිය බව ප්‍රහාරයට පෙර, එරට වේලාවෙන් පෙ.ව. 9:42ට එක් සැකකරුවෙකුගේ මවක් පොලිසියට ඇමතුමක් දෙමින් කියා සිටියා.

එසේම ඔහු තවත් මිතුරෙකු සමග ගිය බවත් එම කාන්තාව පවසා තිබෙනවා.

එම තරුණයා දමා ගොස් තිබූ සටහනක පොදු වෛරී ප්‍රකාශ හා වෛරී සහගත අදහස් සටහන් කර තිබෙනවා.

මේ ප්‍රහාරයට හේතුව මෙතෙක් අනාවරණය වී නොමැති නමුත්, ප්‍රහාරය එල්ල වූ ස්ථානය හා මුස්ලිම් පල්ලියේ ඇති ප්‍රමුඛත්වය හේතුවෙන් එය වෛරී අපරාධයක් ලෙස උපකල්පනය කරලා තිබෙනවා.

මූලාශ්‍රය l BBC