දැන් ඕනම දෙයක් 3D විදිහට Print කරන්න පුළුවන්ද? ලොවක් මවිතකළ විස්මිත සොයාගැනීම.|Hiru TV Blog

දැන් ඕනම දෙයක් 3D විදිහට Print කරන්න පුළුවන්ද? ලොවක් මවිතකළ විස්මිත සොයාගැනීම.

Monday, 20 April 2026 - 14:45 | Views - 216

ලොව පුරා අන්ධභාවයෙන් පීඩාවිඳින මිලියන සංඛ්‍යාත ජනතාවට නව බලාපොරොත්තුවක් එක් කරමින්, 3D මුද්‍රණ තාක්ෂණය (3D Printing) භාවිතයෙන් මිනිස් පෙනීම යථාතත්ත්වයට පත්කළ හැකි කෘතිම අක්ෂි කාචයක් (Cornea) සාර්ථකව නිපදවීමට දකුණු කොරියානු විද්‍යාඥයන් පිරිසක් සමත්වෙලා තිබෙනවා.

පෝහන්ග් විද්‍යා හා තාක්ෂණ විශ්වවිද්‍යාලයේ (Pohang University of Science and Technology) හා කියුන්ග්පුක් ජාතික විශ්වවිද්‍යාලයේ (Kyungpook National University) පර්යේෂකයන් එක්ව සිදුකළ මේ සොයාගැනීම වෛද්‍ය විද්‍යා ඉතිහාසයේ සුවිශේෂී සන්ධිස්ථානයක් ලෙස සැලකෙනවා.

මෙහි ඇති සුවිශේෂත්වය නම් මිනිස් සිරුරේ සෛල හා ප්‍රාථමික සෛල (Stem cells) යොදාගනිමින් සකස්කළ විශේෂිත "Bioink" වර්ගයක් මගින් මේ අක්ෂි කාචය මුද්‍රණය කරලා තිබෙනවා.

මීට පෙර සිදුකළ බොහෝ උත්සාහයන් අසාර්ථක වුවත්, මේ නව තාක්ෂණය හරහා ස්වභාවික අක්ෂි කාචයක පවතින විනිවිදභාවය හා නම්‍යශීලී බව ඒ ආකාරයෙන්ම ලබා දීමට පර්යේෂකයන් සමත්වෙලා තිබෙනවා.

ලොව පුරා අක්ෂි කාච බද්ධ කිරීමේදී පවතින ප්‍රධානතම ගැටලුව වන්නේ පටක පරිත්‍යාගශීලීන්ගේ හිඟයයි. නමුත් මෙම 3D මුද්‍රිත පටක නිර්මාණය කිරීමත් සමඟ එම ගැටලුවට සාර්ථක විසඳුමක් ලැබෙනු ඇතැයි අපේක්ෂා කෙරෙනවා.

සැබෑ පටක වලට අතිශයින් සමාන නිසා ශරීරය විසින් මේ බද්ධකළ කොටස් ප්‍රතික්ෂේප කිරීමේ අවදානමද ඉතා අවම බව විද්‍යාඥයන් පවසනවා.

මේ ජෛව ඉංජිනේරුමය දියුණුව අනාගතයේදී පෙනීම අහිමි වූ බොහෝ දෙනෙකුට යළිත් ලෝකය දකින්නට ලැබෙන මහඟු අවස්ථාවක් වනු නොඅනුමානයි.

සටහන: අන්තර්ජාලය ඇසුරින්.