Britneyගේ ජීවිතයේ අලුත් හැරවුම් ලක්ෂ්‍යය.. ඇයි ඇය හදිසියේම පුනරුත්ථාපනයට ගියේ?|Hiru TV Blog

Britneyගේ ජීවිතයේ අලුත් හැරවුම් ලක්ෂ්‍යය.. ඇයි ඇය හදිසියේම පුනරුත්ථාපනයට ගියේ?

Wednesday, 15 April 2026 - 8:49 | Views - 96

ඔයාලා දන්නවා ඇතිනේ ලෝකෙම වසඟයට ගත්ත පොප් තරුව බ්‍රිට්නි ස්පියර්ස් ගැන. "Baby One More Time", "Toxic" වගේ සිංදු වලින් අපිව පිනවපු බ්‍රිට්නි ගැන අලුත්ම ආරංචියක් ඇවිත් තිබෙනවා. හැබැයි මේක ටිකක් කනගාටුදායක පුවතක්.

පසුගිය මාසයේ ඇය මත්පැන් හා මත්ද්‍රව්‍ය භාවිතා කරමින් තම BMW රථය අධිවේගී මාර්ගයක ඉතා වේගයෙන් පදවා තිබුණා. මේ නිසා පොලිසිය ඇයව අත්අඩංගුවට ගත්තා. දැන් එම සිද්ධියෙන් මාසයකට පස්සේ ඇය ස්වේච්ඡාවෙන්ම පුනරුත්ථාපන මධ්‍යස්ථානයකට ඇතුළු වෙන්න තීරණය කරලා තිබෙනවා.

දැන් 44 හැවිරිදි වියේ පසුවන බ්‍රිට්නිට එරෙහිව ඇති DUI (Driving Under the Influence) නඩුව කැලිෆෝනියා අධිකරණයේ විභාග වෙන්න තියෙන්නේ තව සති තුනකින්. ඊට කලින් ඇය මේ විදිහට ප්‍රතිකාර ගන්න තීරණය කළේ තමන්ගේ ජීවිතය නැවතත් යහපත් මඟකට හරවා ගන්නා අරමුණින් බවයි ඇයගේ නියෝජිතයා පවසන්නේ.

"බ්‍රිට්නි නීතියට ගරු කරමින් නිවැරදි පියවර ගත්තා. මේක ඇගේ ජීවිතයේ වෙන්න ඕනේ ලොකු වෙනසක පළමු පියවර කියලා අපි හිතනවා. ඇගේ දරුවනුත් මේ වෙලාවේ ඇය එක්ක ඉන්නවා වගේම, ඇගේ පවුලේ අය ඇයව සාර්ථක කරවන්න ලොකු සැලසුමක් හදමින් ඉන්නවා."

අවුරුදු 13ක් පුරා ඇයගේ පියා විසින් ඇගේ මුළු ජීවිතයම හා මුදල් පාලනය කළා. එම Conservatorship එක අවසන් වුණේ 2021 වසරේදීයි. එතැන් සිට ඇය නිදහසේ ජීවත් වුණත්, මේ වගේ සිදුවීම් නිසා ඇයගේ රසිකයන් නැවතත් ඇය ගැන දැඩි කනස්සල්ලෙන් පසුවෙනවා.