කැනඩාවේදී, ශ්‍රී ලාංකික පවුලක 6 දෙනෙක් ඝාතනය කිරීම ගැන නවතම හෙළිදරව්ව..|Hiru TV Blog

කැනඩාවේදී, ශ්‍රී ලාංකික පවුලක 6 දෙනෙක් ඝාතනය කිරීම ගැන නවතම හෙළිදරව්ව..

Friday, 08 March 2024 - 7:57 | Views - 1,852

කැනඩාවේ ඔටාවාහි නිවසක් තුළ ශ්‍රී ලාංකික පවුලක 6 දෙනෙකු ඝාතනය කිරීමේ සිද්ධිය පිළිබඳව තොරතුරු රාශියක් හෙළිවී තිබෙනවා.

මෙසේ අවාසනාවන්ත ලෙස ඝාතනය වී ඇත්තේ, ශ්‍රී ලංකාවේ සිට කැනඩාවේ මෑතකදී පදිංචියට ගිය පවුලක් බවයි වාර්තා වෙන්නේ.

විදෙස් මාධ්‍ය වාර්තා සඳහන් කළේ, මෙම අපරාධයට සම්බන්ධව පුද්ගලයෙකු අත්අඩංගුවට ගත් බවයි.

මෙසේ අත්අඩංගුවට පත්ව ඇත්තේ 19 හැවිරිදි ශ්‍රී ලාංකික සිසුවෙකු බවයි ද සඳහන්.

කෙසේ වෙතත්, විදෙස් මාධ්‍ය මීට පෙර වාර්තා කළේ, මෙම අපරාධය වෙඩිතැබීමක් බවයි. නමුත් නවතම තොරතුරුවලට අනුව සඳහන් වන්නේ, දරුණු ආයුධයකින් මෙම අපරාධය සිදුකර ඇති බවයි.

35 හැවිරිදි දර්ශනී බණ්ඩාරනායක නම් මවත්, හත් හැවිරිදි ඉනුක වික්‍රමසිංහ, සිව් හැවිරිදි දියණිය අශ්විනි වික්‍රමසිංහ, දෙහැවිරිදි දියණිය රින්යානා වික්‍රමසිංහ සහ
මාස දෙකක දියණිය කෙලී වික්‍රමසිංහ මෙසේ අවාසනාවන්ත ලෙස ජීවිතක්ෂයට පත්ව ඇති අතර පොලීසිය පැවසුවේ, දරුවන්ගේ පියා ධනුෂ්ක වික්‍රමසිංහ තුවාල ලබා මේ වන විට රෝහල්ගතව සිටින බවයි.

එමෙන් ම 40 හැවිරිදි ගාමිණී අමරකෝන් නමැති තවත් පුද්ගලයෙක් ද ඝාතනයට ලක්ව තිබෙනවා.

එසේම, ඝාතනය සිදුකළ පුද්ගලයා ශිෂ්‍යයෙකු බවත්, "ඔහුගේ ඉගනීමේ අවසන් වාරය 2023 ශීත ඍතුවෙන් අවසන් වීමට නියමිතව තිබූ බවද වාර්තාවල වැඩිදුරටත් සඳහන්.

තවද , ඔහු ඊයේ(07) සවස් වරුවේ අධිකරණයට පෙනී සිටි අතර, අසුන් ගැනීමට පෙර ඔහුගේ නම සහ උපන් දිනය සඳහන් කරමින් මඳ වශයෙන් කතා කළ බවද විදෙස් මාධ්‍ය වැඩිදුරටත් සඳහන් කළා.