සුළි කුණාටුවක් ?|Hiru TV Blog

සුළි කුණාටුවක් ?

Sunday, 03 December 2023 - 6:52 | Views - 2,290

නිරිතදිග බෙංගාල බොක්ක ආශ්‍රිත පැවති ගැඹුරු පීඩන අවපාතය ඉදිරි පැය 12 තුළ සුළි කුණාටුවක් දක්වා වර්ධනය වන බව කාලගුණ විද්‍යා දෙපාර්තමේන්තුව පවසනවා.

මෙම පද්ධතිය උතුරු වෙරළට ආසන්නයෙන් දිවයිනෙන් ඉවතට ගමන් කරමින් පවතින අතර, හෙට දිනයේ තමිල්නාඩු වෙරළ තීරයට දක්වා ගමන් කර අනිද්දා වනවිට දකුණු අන්ද්‍රා වෙරළ තීරයෙන් ගොඩබිමට ඇතුලුවනු ඇති බවයි එම දෙපාර්තමේන්තුව දැනුම් දෙන්නේ.

ඒ හේතුවෙන් මන්නාරම සිට කන්කසන්තුරය, ත්‍රිකුණාමලය සහ මඩකලපුව හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල යාත්‍රා කිරීම අවදානම් බව එම දෙපාර්තමේන්තුව ප්‍රකාශ කළා.

එබැවින් නැවත දැනුම් දෙනතුරු එම මුහුදු ප්‍රදේශයේ යාත්‍රා නොකළ යුතුයි. එමෙන්ම ගාල්ල සිට මාතර හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල අවධානයෙන් කටයුතු කරන ලෙසත් ධීවර හා නාවික ප්‍රජාවට කාලගුණ විද්‍යා දෙපාර්තමේන්තුව දැනුම් දෙනවා.

මේ අතර උතුර, උතුරුමැද පළාත්වලත් ත්‍රිකුණාමලය සහ මඩකලපුව දිස්ත්‍රික්කවල ඇතැම් ස්ථානවලට මිලිමීටර 75 කට වැඩි තරමක තද වැසි ඇතිවිය බව කාලගුණ විද්‍යා දෙපාර්තමේන්තුව ප්‍රකාශ කළා.

ඌව පළාතේත් අම්පාර සහ හම්බන්තොට දිස්ත්‍රික්කවලට පස්වරු එකෙන් පසු තැනින් තැන වැසි හෝ ගිගුරුම් සහිත වැසි ඇතිවිය හැකියි. උතුර, උතුරුමැද, වයඹ සහ දකුණු පළාත්වලත්, ත්‍රිකුණාමලය සහ මඩකලපුව දිස්ත්‍රික්කවලත් විටින් විට පැයට කිලෝමීටර 50 ක පමණ තද සුළං ඇතිවිය හැකි බවයි කාලගුණ විද්‍යා දෙපාර්තමේන්තුව ප්‍රකාශ කළේ.