කාකි ඇඳුමට නොසැඟවුණු , හදවතේ දයාව.. නොලැබෙන්න ගිය අවස්ථාව ලැබුණු හැටි ?|Hiru TV Blog

කාකි ඇඳුමට නොසැඟවුණු , හදවතේ දයාව.. නොලැබෙන්න ගිය අවස්ථාව ලැබුණු හැටි ?

Tuesday, 17 October 2023 - 11:28 | Views - 442

දරුවන්ට හදිසි අනතුරක් වෙන වෙලාව කාටවත් හරියට කියන්න බැහැ..

ඒත් එක්කම මේ කියන්න යන්නේ ඒ වගේ මොහොතක දරුවෙක් අපේක්ෂා නොකළ අනතුරක් ගැනයි...

කොහොම වුණත් පුංචි නිලිෂගේ බය සංකාව නැති වෙලා තියෙන්නේ ඒ පොලිස් මාමා පුංචි පුතාට උදව්කරන්න ආව නිසා වෙන්න ඇති... කොහොම වුණත් බහුතරයක් දෙනා බනින පොලීසිය ඇතුලේ මේ වගේ හොඳ හිත් තියනවා කියන එකත් ඒ කතාවෙන් ඔප්පු වෙනවා... මෙන්න ඒ කතාව...

නිලිෂ දේශාංජන බෝකුන්දර මහින්ද කනිෂ්ඨ විද්‍යාලයේ අධ්‍යාපනය ලබමින් සිටින දරුවෙකි. ඔහු මෙවර ශිෂ්‍යත්ව විභාගයට පෙනී සිටීම සඳහා බොරලැස්ගමුව‍ මහා විද්‍යාලයේ විභාග ශාලාව වෙත පැමිණ පළමු ප්‍රශ්න පත්‍රයට පිළිතුරු ලියා අවසන් කර තිබිණි. අනතුරුව ලද විවේකයේදී තවත් සිසුවකු සමඟ වැසිකිළියට යෑමට දිව යෑමේදී ගොඩනැඟිල්ලේ කෙළවරේ පය පැටලී වැටී හිස පැළී ලේ ගලන්න වීමෙන් ඔහු මහත් බියට පත්ව හඬා වැටණා....

ඒ අවස්ථාවේ වහා ක්‍රියාත්මක වූ විභාග ආරක්ෂණ අධීක්ෂණ රාජකාරි සඳහා පැමිණ සිටි බොරලැස්ගමුව පොලිසියේ පරිසර අංශයේ ස්ථානාධිපති ලෙස කටයුතු කරන උප පොලිස් පරීක්ෂක ධර්මදාස එගොඩආරච්චි මහතා දරුවා අස්වසා, වහා විභාග ශාලාධිපතිවරයා දැනුවත් කර, ඔහුගේ අවසරය මත තම පෞද්ගලික මෝටර් රථයෙන් දරුවා විනාඩි කීපයක් ඇතුළත වේරහැර කොතලාවල ආරක්ෂක විද්‍යා පීඨ රෝහල කරා රැගෙන ගොස් එහි වෛද්‍යවරුන්ට දරුවා මෙවර ශිෂ්‍යත්ව විභාගයට පෙනී සිටින දරුවකු බවට කරුණු පවසා, ක්ෂණිකව ප්‍රතිකාර කරන ලෙස ඉල්ලා තිබිණා....

ඒ ඉල්ලීමට යහපත් ප්‍රතිචාරයක් දැක්වූ වෛද්‍යවරුන්ද යුහුසුලුව දරුවාට ප්‍රතිකාර කර තිබුණා...

ඒ අනුව යළි දරුවා විභාග ශාලාව වෙත රැගෙන ඒමට උප පොලිස් පරීක්ෂකවරයා කටයුතු කළ අතර, ඒ කාලය අතරතුර විභාග ශාලාධිපතිවරයා අවශ්‍ය වගකිව යුතු ස්ථානවලට දුරකතනයෙන් අමතා හදිසි අනතුරට ලක් වූ දරුවා වෙනුවෙන් අමතර කාලයක් ලබාගෙන ඔහුට අසාධාරණයක් නොවන ලෙස කටයුතු කිරීමට අවශ්‍ය කටයුතු කර ඇති බවටයි වාර්තා වෙන්නේ...

විභාගය අවසන දරුවා කැටුව යෑමට පැමිණි මිත්තණිය උප පොලිස් පරීක්ෂකවරයාට සිට ප්‍රණාමය පුද කර සිටියේ කඳුළු පිරි දෙනෙතින්..