අක්මීමන, බටදූව ප්‍රදේශයේ පිහිටි ක්‍රිශාන්ත පුෂ්පකුමාරට අයත් දේවාලයකදී පසුගිය 23 වැනිදා 16 හැවිරිදි දැරියකට සිදුවූ ලිංගික අපයෝජනයක් සම්බන්ධයෙන් අක්මීමන පොලිසියට පැමිණිල්ලක් ලැබී තිබෙනවා.
 
ඉන් චෝදනා එල්ල වුණේ දකුණු පළාත් සභාවේ එක්සත් ජනතා නිදහස් සන්ධාන මන්ත්‍රී ක්‍රිෂාන්ත පුෂ්පකුමාර හෙවත් රත්තරංටයි.
 
නීතීඥයකු මාර්ගයෙන් අද උදෑසන අක්මීමන පොලිසියට භාරවූ මන්ත්‍රීවරයා එහිදී අත්අඩංගුවට ගැණුනා.

අධිකරණයට රැගෙන යන අතරතුර ඔහු මාධ්‍යවේදීන්ට හමුවේ අදහස් දැක්වුවේ මේ අයුරිනුයි.
 
"මාධ්‍ය හරි දේ වාර්තා කරන්න ඕන. මොකද මාධ්‍යයට මගේ කට වහන්න බැහැ මෙහෙම. ඔයවගේ දේවල් කළා කියලා කට වහන්න බෑ. අද මට අසාධාරණය කරනවා වගේම හෙට මට නිවැරදි දේත් සාධාරණයක් ඉෂ්ට කරන්න ඕන මාධ්‍යය."
 
අනතුරුව සැකකාර පළාත් සභා මන්ත්‍රීවරයා ගාල්ල අතිරේක මහේස්ත්‍රාත්වරයා හමුවට ඉදිරිපත් කෙරුණු අතර මහේස්ත්‍රාත්වරයා නියෝග කලේ රුපියල් ලක්ෂ 5ක ශරීර ඇප 2ක් සහ රුපියල් 25,000ක මුදල් ඇපයක් මත සැකකරු මුදා හැරීමටයි.
 
අදාල නඩුව අප්‍රේල් 30 වනදා යළි කැඳවීමට නියමිතයි.
 
ඇප ලබා අධිකරණයෙන් පිටතට පැමිණි මන්ත්‍රීවරයා පසුව මාධ්‍යයට දැක්වූයේ මෙවන් ප්‍රතිචාරයක්.
 
"බොහොම ස්තූතියි හැමෝටම. බොහොම ස්තූතියි මේ කරුණු වාර්තා කළාට. සාධාරණය ඉෂ්ට වෙනවා කියලා විශ්වාස කරනවා."
 
අනතුරුව දකුණු පළාත් සභා මන්ත්‍රී ක්‍රිෂාන්ත පුෂ්පකුමාර මහතා සිය නිවසේදී ප්‍රවෘත්ති සාකච්ඡාවක්ද කැඳවා තිබුණා.