කෘත්‍රිම ආහාර පිටුපස ඇති නොසිතූ අන්තරාය.. තරුණ පරපුර බඩවැල් රෝගවලට ගොදුරු වීමේ අවදානමක..|Hiru TV Blog

කෘත්‍රිම ආහාර පිටුපස ඇති නොසිතූ අන්තරාය.. තරුණ පරපුර බඩවැල් රෝගවලට ගොදුරු වීමේ අවදානමක..

Friday, 14 August 2026 - 15:48 | Views - 45

තරුණ තරුණියන් කෘත්‍රිම හා ක්ෂණික ආහාර සඳහා වැඩිපුර නැඹුරු වීමේ අහිතකර ප්‍රතිඵලයක් ලෙස ඔවුන් බඩවැල් ආශ්‍රිත රෝගවලට ගොදුරු වීමේ විශාල ප්‍රවණතාවක් මතුව ඇති බව ආමාශ ආන්ත්‍රික හා අක්මා සම්බන්ධ විශේෂඥ වෛද්‍ය සුපුන් කුලතුංග අනතුරු අඟවනවා.

වර්තමාන තරුණ පරපුර එළවළු, පලතුරු, කොළ වර්ග, ධාන්‍ය සහ තන්තුමය ආහාර භාවිතයෙන් ඈත්වීම මෙලෙස රෝගීන් සංඛ්‍යාව ඉහළ යාමට ප්‍රධානතම හේතුව වී ඇති බව සෞඛ්‍ය ප්‍රවර්ධන කාර්යාංශයේ පැවැති මාධ්‍ය හමුවකට එක්වෙමින් විශේෂඥ වෛද්‍යවරයා පෙන්වා දුන්නා.

එමෙන්ම දෛනිකව ලබාගන්නා යම් යම් ඖෂධ වර්ග මෙන්ම තයිරොයිඩ් ග්‍රන්ථියේ අධි ක්‍රියාකාරීත්වය වැනි තත්ත්වයන් හේතුවෙන්ද නිතර නිතර වැසිකිළි යාමට සිදුවීම වැනි බඩවැල් ආශ්‍රිත වෙනස්කම් ඇතිවිය හැකි බව ඔහු සඳහන් කළා.

යම් අයෙකුට හදිසියේම වැසිකිළි යාමේ රටාවේ යම් වෙනසක් සිදුවී, එම තත්ත්වය සති කිහිපයක් තිස්සේ නොකඩවා පවතින්නේ නම් හෝ දීර්ඝකාලීන මලබද්ධය වැනි ලක්ෂණ ඇත්නම්, එය සුළුකොට නොතකා වහාම සුදුසුකම් ලත් වෛද්‍ය උපදෙස් ලබාගැනීමට කටයුතු කළ යුතු බවද විශේෂඥ වෛද්‍යවරයා වැඩිදුරටත් අවධාරණය කර සිටිනවා.