පියයුරු පිළිකා කල්තියා හඳුනා ගැනීමේ හැකියාවක් සහිත විශේෂ තනපටක් නිර්මාණය කිරීමට මෙක්සිකෝවේ තරුණයෙක් සමත්ව තිබෙනවා.

ජුලියන් රියෝස් නම් 18 හැවිරිදි මෙම තරුණයා තම මිතුරන්ගේ සහය ඇතිව මෙම නිර්මාණය සිදුකර ඇති බවයි වාර්තා වන්නේ.

"ඉවා බ්‍රා" ලෙස නම්කර ඇති මෙම නිර්මාණයෙන් පිළිකාවක් ඇතිවීමට බලපාන සාධකයක්  පියයුර තුළ ඇතිවේනම් ඒ පිළිබඳව අනතුරු ඇඟවීමේ හැකියාවක් පවතින බවයි ඔවුන් පවසන්නේ.  

මූලාකෘති තත්වයේ පවතින මෙම නිර්මාණයට ශිෂ්‍ය ව්‍යවසායකයන් සඳහා වන ලෝක සම්මාන උළෙලේ පළමු ත්‍යාගය හිමිවී ඇති බවයි විදෙස් මාධ්‍ය වාර්තා කරන්නේ.

මෙම නිර්මාණය අත්හදා බැලීමේ මට්ටමට ගෙන ඒම සඳහා අවශ්‍ය මුදල් මේවනවිටත් ලැබී ඇති බවයි එහි නිෂ්පාදකයින් පවසන්නේ.

සිය මවට පියයුරු පිළිකාවක් වැළඳී ඇයගේ පියයුරු යුවළ ඉවත් කිරීමට සිදුවීම හේතුවෙන් 18 හැවිරිදි ජුලියන් රියෝස් හට මෙම විශේෂ තනපටය නිපදවීමට අදහස පහළවී ඇති බවයි වාර්තා වන්නේ.

පියයුරු පිළිකා කල්තියා හඳුනා ගැනීමේ හැකියාවක් සහිත බවට විශ්වාස කෙරෙන මෙම විශේෂ තනපට ලබන වසරේ වෙළඳපලට නිකුත් කළහැකි බවයි  මෙහි නිර්මාණකරුවන් පවසන්නේ.