තව්තිසා දෙව්ලොවින් බුදුහිමි වැඩම කළ, උතුම් කඨින පිංකම් සමයට මුලපුරන වප් පෝය අදයි..|Hiru TV Blog

තව්තිසා දෙව්ලොවින් බුදුහිමි වැඩම කළ, උතුම් කඨින පිංකම් සමයට මුලපුරන වප් පෝය අදයි..

Sunday, 25 October 2026 - 9:59 | Views - 42

සංඝමිත්තා තෙරණියගේ ලංකා ගමනට මඟපෑදීම, කඨින චීවර මාසයේ ආරම්භය සහ මාතෘ දිව්‍ය රාජයා ඇතුළු දෙවියන්ට අභිධර්මය දේශනා කළ බුදුරජාණන් වහන්සේ තව්තිසා දෙව්ලොවින් සංකස්ස පුරයට වැඩම කරවීම ඇතුළු ශාසනික ඉතිහාසයේ වැදගත් සිදුවීම් රැසක් සනිටුහන් වන පින්බර වප් පුර පසළොස්වක පෝය දිනය අදට (25) යෙදී තිබෙනවා.

වස්සාන ඍතුවේ අවසාන පෝය දිනය වන වප් පෝයත් සමඟම බෞද්ධ ජනතාවගේ උතුම්ම ආමිස පූජාවක් ලෙස සැලකෙන 'කඨින චීවර පූජා' පැවැත්වෙන කඨින මාසය (වප් මහ) ආරම්භ වනු ඇති.

මාතෘ දිව්‍ය රාජයාට සහ දෙවියන්ට අභිධර්මය දේශනා කිරීමෙන් අනතුරුව, බුදුරජාණන් වහන්සේ දෙව්ලොවින් සංකස්ස පුරයට වැඩම කරවන ලද්දේ අද වැනි වප් පුර පසළොස්වක පෝය දිනකයි.

එමෙන්ම, දේවානම්පියතිස්ස රජතුමාගේ ඉල්ලීම පරිදි ශ්‍රී මහා බෝධීන් වහන්සේගේ දක්ෂිණ ශාඛාව සහ මෙහෙණි සසුන පිහිටුවීම සඳහා සංඝමිත්තා තෙරණිය ලංකාවට වැඩම කරවීමට ආරාධනා කිරීමට මහමෙවුනා උයනේදී මහා අරිට්ඨ අමාත්‍යවරයා ඇතුළු දූත පිරිස දඹදිව ධර්මාශෝක රජු වෙත පිටත් කර හරින ලද්දේද අද වැනි පෝය දිනකදීයි.

මහා අරිට්ඨ හිමියන් ඇතුළු පිරිස චේතියගිරියේදී (මිහින්තලේ) උපසම්පදාව ලැබීම සහ ශ්‍රී ලංකාවේ ප්‍රථම ධර්ම සංගායනාව තඹපණ්ණියේදී පැවැත්වීම සිදුවූයේද වප් පෝය දිනකදී වන අතර, පෙරවස් විසූ භික්ෂූන් වහන්සේලා වස් පවාරණය කිරීම සහ අටමහා කුසල් අතර අග්‍රගණ්‍ය පූජාව වන කඨින චීවර පූජාමය පින්කම් පැවැත්වෙන කඨින මාසය වප් පෝය දිනෙන් ආරම්භ වනු ඇති.