ග්‍රැමී සම්මාන උළෙලෙන් BTS ඉවත් වෙයි. මෙවර කිසිදු නිර්මාණයක් ඉදිරිපත් නොකිරීමට තීරණයක්..|Hiru TV Blog

ග්‍රැමී සම්මාන උළෙලෙන් BTS ඉවත් වෙයි. මෙවර කිසිදු නිර්මාණයක් ඉදිරිපත් නොකිරීමට තීරණයක්..

Friday, 31 July 2026 - 9:38 | Views - 35

ලෝක ප්‍රකට දකුණු කොරියානු K-pop සංගීත කණ්ඩායමක් වන BTS එළඹෙන වසරේ පැවැත්වෙන 69 වැනි ග්‍රැමී සම්මාන උළෙල සඳහා කිසිදු ගීතයක් හෝ ඇල්බමයක් ඉදිරිපත් නොකිරීමට තීරණය කර තිබෙනවා.

ජාත්‍යන්තර සංගීත ක්ෂේත්‍රයේ දැවැන්ත පෙරළියක් ඇති කරමින් ඔවුන් ගත් මෙම තීරණය පිළිබඳව මේ වනවිට ලොව පුරා රසිකයින්ගේ සහ විචාරකයින්ගේ දැඩි අවධානය යොමු වී තිබෙනවා.

ග්‍රැමී සම්මාන උළෙලේ සංවිධායක මණ්ඩලය වන 'රෙකෝඩින් ඇකඩමිය' (Recording Academy) මගින් හඳුන්වා දෙනු ලැබූ නවතම Best Asian Pop Music Performance නැමැති සම්මාන කාණ්ඩයට එරෙහිව BTS කණ්ඩායම මෙම පියවර ගත් බව වාර්තා වනවා.

මෙම තීරණය සම්බන්ධයෙන් BTS කණ්ඩායමේ සාමාජිකයන් සිය නිල Instagram ගිණුම් හරහා අදහස් දැක්වීමට කටයුතු කළා. මෙවර ග්‍රැමී සම්මාන උළෙලට ඇතුළු නොවීමට තමන් තීරණය කළ බවත්, සංගීතය ප්‍රදේශවලට හෝ භාෂාවන්ට බෙදා වෙන් කරනු වෙනුවට එය පවතින ආකාරයෙන්ම ශ්‍රවණය කිරීමට සහ ආදරය කිරීමට ලක්විය යුතු බව ඔවුන් සඳහන් කළා.

ග්‍රැමී සංවිධායකයන් විසින් මෙම නව කාණ්ඩය හඳුන්වා දී ඇත්තේ දකුණු කොරියාව, ජපානය, චීනය සහ කලාපයේ අනෙකුත් ප්‍රදේශවලින් බිහි වන ආසියානු පොප් සංගීතය ඇගයීම සඳහා බව සංවිධායකයින් ප්‍රකාශ කළා.

කෙසේවෙතත්, මෙය ආසියානු කලාකරුවන් සෙසු බටහිර කලාකරුවන්ගෙන් වෙන් කොට වෙනම රාමුවකට සීමා කිරීමක් බවට විචාරකයින් සහ රසිකයන් මත පළ කර තිබෙනවා.