පාරේ යන්න බැරි නම් අහසින් යමු.. ළඟදීම ලංකාවට එන ඩ්‍රෝන ගැන මේ විස්තරේ ඔයා දැනගෙන හිටියද?|Hiru TV Blog

පාරේ යන්න බැරි නම් අහසින් යමු.. ළඟදීම ලංකාවට එන ඩ්‍රෝන ගැන මේ විස්තරේ ඔයා දැනගෙන හිටියද?

Wednesday, 15 July 2026 - 16:20 | Views - 38

ඔන්න ලංකාවේ ප්‍රවාහන ක්ෂේත්‍රයේ ලොකු පෙරළියක් කරමින් ඩ්‍රෝන යානා (Drones) හරහා මගීන් ප්‍රවාහනය කරන වැඩක් පටන්ගන්න සිවිල් ගුවන් සේවා අධිකාරිය පියවර අරගෙන තිබෙනවා.

ඒ අනුව, එකවර මගීන් 6 දෙනෙකු පමණ රැගෙන යා හැකි පරිදි මෙම ඩ්‍රෝන ප්‍රවාහන සේවාව ක්‍රියාත්මක කිරීමට තීරණය කළ බව‍ සිවිල් ගුවන් සේවා අධිකාරියේ අධ්‍යක්ෂ ජනරාල් කපිතාන් තමින්ද රඹුක්වැල්ල පැවසුවා.

මෙම සුවිශේෂී ව්‍යාපෘතියට අදාළ මූලික සාකච්ඡා මේ වන විටත් සාර්ථකව අවසන් කර ඇති බවද ඔහු සඳහන් කළා.

ජාත්‍යන්තර සිවිල් ගුවන් සේවා සංවිධානයේ (ICAO) උපදෙස් හා මඟපෙන්වීම් මත, ප්‍රවාහන අමාත්‍යාංශය ඇතුළු අදාළ රාජ්‍ය ආයතන සමඟ ඒකාබද්ධව මෙම ව්‍යාපෘතිය ක්‍රියාත්මක කෙරෙනවා.

මෙහි ඊළඟ අදියරේ කටයුතු සිදු කිරීම සඳහා ඩ්‍රෝන යානා සපයන සමාගමට අනුබද්ධ තායිලන්ත විශේෂඥ කණ්ඩායමක් මෙම මාසය අවසන් වීමට පෙර මෙරටට පැමිණීමට නියමිතව තිබෙනවා.

එම කමිටුව හරහා මෙම ඩ්‍රෝන ප්‍රවාහන සේවාව දියත් කිරීම සහ එහි ඉදිරි සංවර්ධන කටයුතු පිළිබඳව දීර්ඝ වශයෙන් සාකච්ඡා කිරීමට නියමිත බව ද කපිතාන් රඹුක්වැල්ල සඳහන් කළා.

රාජ්‍ය-පෞද්ගලික හවුල්කාරිත්වයක් (PPP) යටතේ ඉහළ ආයෝජන ව්‍යාපෘතියක් ලෙස සංවර්ධනය කෙරෙන මෙම සේවාව මඟින් මගී ප්‍රවාහනයට අමතරව භාණ්ඩ ප්‍රවාහන කටයුතු ද ඉතා පහසුවෙන් සිදු කිරීමට සැලසුම් කර තිබෙනවා.

විශේෂයෙන්ම අන්තර් ප්‍රවාහනය, ළඟාවීමට අපහසු කඳුකර ප්‍රදේශ මෙන්ම මෙරට ප්‍රධාන සංචාරක ගමනාන්ත වෙත මගීන් ප්‍රවාහනය සඳහා මෙය කදිම විකල්පයක් වනු ඇතැයි සිවිල් ගුවන් සේවා අධිකාරිය පෙන්වා දෙනවා.

මෙම ව්‍යාපෘතියට අදාළව ඩ්‍රෝන ක්‍රියාකරුවන් සඳහා අවශ්‍ය තාක්ෂණික පුහුණුව ලබා දීම සහ අදාළ රෙගුලාසි පැනවීම සිවිල් ගුවන් සේවා අධිකාරිය මඟින් සිදු කරන අතර ශ්‍රී ලංකාව තුළ අවම වියදමකින් යුත්, ඉතා කාර්යක්ෂම සහ නූතන තාක්ෂණයෙන් ඉහළ ප්‍රවාහන සේවාවක් බිහිකිරීමේ අරමුණින් මෙම පියවර ගත් බව අධ්‍යක්ෂ ජනරාල්වරයා වැඩිදුරටත් අවධාරණය කළා.

ලෝකය ඉස්සරහට යද්දී අපේ රටත් මේ විදිහට අලුත් තාක්ෂණයත් එක්ක ඉස්සරහට යන එක ගැන නම් ඇත්තටම සතුටු වෙන්න පුළුවන්.