මීගමුව බන්ධනාගාරයේ ගැටුමෙන් ඉන්දී‍යානුවෙකුත් මිය ගිහින්.. 'The Hindu' අනාවරණය කළ මීගමුව ඛේදවාචකයේ තොරතුරු මෙන්න..|Hiru TV Blog

මීගමුව බන්ධනාගාරයේ ගැටුමෙන් ඉන්දී‍යානුවෙකුත් මිය ගිහින්.. 'The Hindu' අනාවරණය කළ මීගමුව ඛේදවාචකයේ තොරතුරු මෙන්න..

Thursday, 09 July 2026 - 10:20 | Views - 66

ඉකුත් දා මීගමුව බන්ධනාගාරයේ සිදු වූ ගැටුම අතරතුර මියගිය රැඳවියන් අතර ඉන්දීය ජාතිකයෙකු ද සිටින බව 'The Hindu' පුවත්පත වාර්තා කරනවා.

කොළඹ මූලික කරගත් සිය නිල ආරංචි මාර්ග තහවුරු කර දක්වමින් 'The Hindu' වාර්තා කරන්නේ මරණකරු 73 හැවිරිදි උන්නික්‍රිෂ්ණන් එස්. (Unnikrishnan S.) නමැති අයෙකු ලෙසයි.

මෙම ඉන්දීය ජාතිකයාගේ මරණය සම්බන්ධයෙන් ශ්‍රී ලංකාවේ ඉන්දීය මහකොමසාරිස් කාර්යාලය මෙතෙක් නිල ප්‍රකාශයක් නිකුත් කර නැතත්, සිද්ධිය සම්බන්ධයෙන් ඉන්දීය දූත මණ්ඩලය විසින් ශ්‍රී ලංකා විදේශ කටයුතු අමාත්‍යාංශය වෙත රාජ්‍ය තාන්ත්‍රික නිවේදනයක් යොමු කර ඇති බව එම පුවත් වාර්තාව සඳහන් කළා.

මීට අමතරව, මීගමුව බන්ධනාගාරයේ රඳවා සිටි ඉන්දීය ජාතිකයන් වෙනත් බන්ධනාගාර වෙත මාරු කර යවා ඇති බව ද එම ආරංචි මාර්ග සඳහන් කරන බව 'The Hindu' වැඩිදුරටත් වාර්තා කරනවා.

මියගිය ඉන්දීය ජාතිකයාට එරෙහිව පැවති චෝදනා සහ මීගමුව බන්ධනාගාරයෙන් මාරුකර යැවූ සමස්ත ඉන්දීය රැඳවියන් සංඛ්‍යාව පිළිබඳ වැඩිදුර තොරතුරු ලබාගැනීම සඳහා 'The Hindu' පුවත්පත ශ්‍රී ලංකා බන්ධනාගාර දෙපාර්තමේන්තුවෙන් සහ ඉන්දීය මහ කොමසාරිස් කාර්යාලයෙන් විමසීම් කර ඇතත්, මෙතෙක් ඊට ප්‍රතිචාර ලැබී නැති බව එම පුවත් වාර්තාව වැඩිදුරටත් සඳහන් කරනවා.