මීගමුව බන්ධනාගාරය තවමත් නොසන්සුන්! යළි නොසන්සුන් ලෙස හැසිරුණු කාන්තා රැඳවියන් පිරිසක් වෙනත් බන්ධනාගාරවලට...|Hiru TV Blog

මීගමුව බන්ධනාගාරය තවමත් නොසන්සුන්! යළි නොසන්සුන් ලෙස හැසිරුණු කාන්තා රැඳවියන් පිරිසක් වෙනත් බන්ධනාගාරවලට...

Thursday, 09 July 2026 - 9:43 | Views - 67

පසුගිය 05 සහ 06 යන දිනවල රැඳවියන් දෙපිරිසක් අතර දරුණු ගැටුමක් හටගත් මීගමුව බන්ධනාගාරය තුළ, ඊයේ (08) දිනයේදී ද යළිත් වරක් සුළු නොසන්සුන්කාරී තත්ත්වයක් හටගෙන තිබෙනවා. කෙසේ වෙතත් පොලිසිය සහ බන්ධනාගාර නිලධාරීන් එක්ව තත්ත්වය වහාම පාලනය කිරීමට පියවර ගෙන ඇති බවයි වාර්තා වන්නේ.

පසුගියදා ඇති වූ ගැටුම්වලින් පසුව බන්ධනාගාරයේ ඇතුළත ආරක්ෂක තත්ත්වය පරීක්ෂා කිරීම සඳහා ඊයේ නිලධාරීන් කණ්ඩායමක් එක්ව තිබෙනවා. එම අවස්ථාවේදී එහි රඳවා සිටින 700කට අධික රැඳවියන් අතුරින් පිරිසක් සිරමැදිරිවලින් පිටතට පැමිණ විරෝධය පළ කර ඇති අතර, එහිදී කලහකාරී ලෙස හැසිරුණු කාන්තා රැඳවියන් පිරිසක් වහාම ක්‍රියාත්මක වන පරිදි වාරියපොළ බන්ධනාගාරය වෙත මාරු කර යැවීමට බලධාරීන් පියවර ගෙන තිබෙනවා.

මේ අතර, පෙර පැවති ගැටුම්වලින් මියගිය රැඳවියන්ගේ මරණ පරීක්ෂණ සම්බන්ධයෙන් මේ වන විට විවෘත තීන්දුවක් නිකුත් කර ඇති අතර, අදාළ වෛද්‍ය වාර්තා අද (09) දින මීගමුව අධිකරණය වෙත ඉදිරිපත් කිරීමට නියමිතයි. මියගිය අය අතර සිටින ඉන්දීය ජාතික රැඳවියා සම්බන්ධයෙන් මෙතෙක් අනන්‍යතාවය තහවුරු කර ගැනීමේ කටයුතු අවසන් වී නොමැති බව ද පොලිසිය සඳහන් කළා.

බන්ධනාගාරය තුළ පවතින මෙම නොසන්සුන් වාතාවරණය හේතුවෙන් රැඳවියන්ගේ ඥාතීන් විශාල පිරිසක් ඊයේ දිනයේදීත් බන්ධනාගාරය ඉදිරිපිට රැඳී සිටි අතර, ආරක්ෂක හේතූන් මත ඔවුන්ව එම ස්ථානයෙන් ඉවත් කිරීමට පොලිසිය සහ බන්ධනාගාර නිලධාරීන් කටයුතු කර තිබෙනවා.